Қазақстанда авиация саласын цифрландыру жұмыстары жалғасуда. Көлік министрі Нұрлан Сауранбаев елімізде ішкі әуе рейстерінде биометриялық жүйе енгізілетінін мәлімдеді, деп хабарлайды Malim.kz.
Министрдің айтуынша, алғашқы пилоттық жоба Астана – Шымкент бағыты бойынша іске асырылады.
«Қазіргі уақытта әуежайларда Q-Gate жүйесі жұмыс істеп тұр. Бұл жүйе жолаушылардың тексеруден өту уақытын 3 минуттан 50 секундқа дейін қысқартады. Қазір Астана және Алматы әуежайларында осындай 16 терминал орнатылған», – деді министр.
Оның сөзінше, биыл Шымкент, Атырау, Ақтөбе және Ақтау қалаларындағы әуежайларда қосымша 16 терминал орнату жоспарланып отыр. Әр әуежайға төрт терминалдан қойылады.
Сондай-ақ жүк тасымалы саласында e-Freight жүйесі енгізіліп жатыр. Министрдің айтуынша, бұл жүйе жүктерді өңдеу уақытын бір күннен бір сағатқа дейін қысқартуға мүмкіндік береді және барлық процесті толық цифрландыруды қамтамасыз етеді.
Жаңа технологияларды енгізу авиация саласындағы қызмет көрсету сапасын арттырып, жолаушыларға ыңғайлы жағдай жасауға бағытталған.