Скандинавия аймақтарынан келген антициклон Қазақстан аумағына суық ауа массаларын алып келіп, алдағы күндері елдің басым бөлігінде ауа температурасының күрт төмендеуіне себеп болады, деп хабарлайды Malim.kz.
Мамандардың болжамынша, антициклонның ықпалы әсіресе солтүстік, шығыс және орталық өңірлерде қатты сезіледі. Аталған аймақтарда түнгі уақытта ауа температурасы нөлден төмендеп, үсік жүруі мүмкін.
Синоптиктердің мәліметінше, антициклон ел аумағы арқылы жылжыған сайын 13 мамыр түні оңтүстік-шығыс өңірлерде де үсік күтіледі. Суық ауа массаларының әсері алдағы бірнеше күн бойы сақталмақ.
Айта кетейік, бұған дейін мамандар мамыр айының екінші және үшінші онкүндігінде Қазақстанның батыс, оңтүстік және орталық өңірлерінде күндіз ауа температурасы +33…+41 градусқа дейін көтерілуі мүмкін екенін хабарлаған еді. Осылайша ел тұрғындарын ауа райының күрт құбылуы күтіп тұр.