Қазақстанда әкімшілік рақымшылық мас күйінде көлік жүргізгені үшін жүргізуші куәлігінен айырылған азаматтарға қолданылмайды. Бұл туралы Ішкі істер министрлігі мәлім етті, деп хабарлайды Malim.kz.
Жаңа Конституцияның қабылдануына байланысты жарияланған рақымшылық 15 мыңнан астам қылмыстық жауапкершілікке тартылған адамды, сондай-ақ жалпы сомасы 17 млрд теңгеден асатын 1 миллионға жуық әкімшілік айыппұлды қамтуы мүмкін.
Қылмыстық рақымшылық қылмыстық теріс қылықтар мен онша ауыр емес қылмыстар жасаған адамдарға қолданылады. Сондай-ақ келтірілген залал болмаған немесе толық өтелген жағдайда орташа ауырлықтағы қылмыстар үшін сотталғандарға да қолданылуы мүмкін.
ІІМ мәліметінше, қылмыстық рақымшылық шаралары 15 мыңнан астам адамға қатысты қолданылуы ықтимал. Оның ішінде 1,5 мыңға жуық сотталған адам түзеу мекемелерінде жазасын өтеп жатыр.
Алайда рақымшылық терроризм, экстремизм, сыбайлас жемқорлық, ұйымдасқан қылмыстық топ құрамында жасалған қылмыстар, азаптау, сондай-ақ жыныстық тиіспеушілікке қарсы, әсіресе кәмелетке толмағандарға қатысты қылмыстар үшін сотталғандарға қолданылмайды. Қайталама қылмыс жасағандар да рақымшылыққа ілікпейді.
Қазақстанда алғаш рет әкімшілік рақымшылық та өткізіледі. Ол Әкімшілік құқық бұзушылық туралы кодекстің 263 бабын қамтиды.
Азаматтар, жеке кәсіпкерлер, нотариустар, адвокаттар және жеке сот орындаушылары 2026 жылғы 17 наурыз сағат 24:00-ге дейін жасалған құқық бұзушылықтар бойынша төленбеген айыппұлдардан босатылуы мүмкін.
Ішкі істер министрлігі әкімшілік рақымшылық адамдардың өмірі мен денсаулығына қауіп төндіретін құқық бұзушылықтарға қолданылмайтынын атап өтті.
Олардың қатарында қару мен есірткінің заңсыз айналымы, жол қозғалысы ережелерін өрескел бұзу, соның ішінде мас күйінде көлік жүргізу, қарсы бағытқа шығу және жүргізуші куәлігінен айыруға әкеп соққан басқа да құқық бұзушылықтар бар.
Сондай-ақ қайталама құқық бұзушылықтар мен сотта қаралып жатқан істер де рақымшылыққа жатпайды.
ІІМ дерегінше, ведомство бағыты бойынша әкімшілік рақымшылық шамамен 1 миллион айыппұлды қамтиды. Олардың жалпы сомасы 17 млрд теңгеден асады.