Қазақстанда мектеп директорларының тапшылығы мәселесі өзекті күйінде қалып отыр. Қазіргі уақытта ел бойынша 438 мектепте директор лауазымы бос тұр. Оның басым бөлігі ауылдық білім беру ұйымдарына тиесілі. Осыған байланысты Оқу-ағарту министрлігі мектеп басшыларын тағайындау талаптарын жеңілдетуді жоспарлап отыр, деп хабарлайды Malim.kz.
Бұл туралы Премьер-министрдің орынбасары – Мәдениет және ақпарат министрі Аида Балаева депутаттық сауалға берген жауабында мәлімдеді.
«Соңғы үш жылда мектеп директорларының бос орындары кезең-кезеңімен қысқарып келеді. 2024 жылы 935 білім беру ұйымында директор болмаған болса, 2025 жылы бұл көрсеткіш 830-ға дейін төмендеді. Бүгінгі таңда мемлекеттік мектептерде 438 директорлық бос орын бар, оның ішінде 385-і ауылдық, 53-і қалалық мектептерге тиесілі», – деді Аида Балаева.
Оның айтуынша, мектеп директорларын тағайындау және іріктеу мәселелері өңірлердегі көшпелі кеңестерде қаралған. Соның нәтижесінде Оқу-ағарту министрлігіне шағын жинақты мектептер директорларына қойылатын біліктілік талаптарын және ротация мерзімдерін қайта қарау тапсырылған.
Қазіргі таңда министрлік педагогикалық лауазымдардың үлгілік біліктілік сипаттамаларына өзгерістер енгізу туралы бұйрық жобасын мемлекеттік органдармен келісіп жатыр.
Жаңа өзгерістерге сәйкес, мектеп директорлығына үміткерлерге қойылатын талаптар жеңілдетіледі. Атап айтқанда, қажетті біліктілік санаты «педагог-сарапшы» деңгейінен «педагог-модератор» деңгейіне дейін төмендетілмек. Сонымен қатар міндетті педагогикалық еңбек өтілі бес жылдан үш жылға қысқартылады.
Кадр тапшылығын жедел шешу мақсатында елімізде Республикалық кадр резерві де құрылған. Мемлекет басшысының тапсырмасымен іске асырылып жатқан жоба аясында соңғы үш жылда 927 басқарушы маман дайындалған. Олардың қатарында 777 директордың орынбасары мен 150 педагог бар.
Кадр резервіндегі мамандарды конкурс өткізбей-ақ басшылық қызметтерге тағайындауға мүмкіндік беріледі. Билік бұл шара бос орындарды жедел толықтыруға ықпал етеді деп есептейді.
Айта кетейік, бұған дейін Мәжіліс депутаты Вера Ким мектеп директорларының тапшылығы мәселесін көтеріп, білім беру саласындағы басқарушы кадрлар мәселесін шешу қажеттігін атап өткен болатын.