24 шілде, жұма күні Қазақстанның басым бөлігінде ауа райы құбылмалы болады, деп хабарлайды Malim.kz.
Синоптиктердің болжамынша, жаңбыр жауып, найзағай ойнайды. Солтүстік, шығыс, орталық және оңтүстік-шығыс өңірлерде қатты нөсер күтіледі. Кей жерлерде екпінді жел соғып, бұршақ жаууы және тұман түсуі мүмкін.
Сонымен қатар еліміздің батысында аптап ыстық сақталады. Батыс Қазақстан, Атырау және Ақтөбе облыстарында, сондай-ақ Қостанай облысының оңтүстігінде ауа температурасы +35…+39 градусқа дейін көтеріледі. Ал Маңғыстау облысында сынап бағаны +42 градусқа дейін жетеді.
Жауын-шашынға қарамастан, еліміздің көптеген өңірінде жоғары және төтенше өрт қаупі сақталады. Әсіресе оңтүстік, батыс, шығыс және орталық облыстарда сақтық шараларын күшейту қажет.