Қытай Тайвань жағалауына жақын жерде зымырандар ұшырып, әскери жаттығу барысында жаңа десанттық кемелерін көрсетті. Сондай-ақ Бейжің болашақта Қытайдың аралға шабуыл жасауына және оны бақылауға алуына жол бермеу үшін АҚШ пен оның одақтастарының ықтимал араласуын жоққа шығарды. Бұл бүгінге дейінгі ең ауқымды әскери жаттығу болды, деп хабарлайды Malim.kz Reuters агенттігіне сілтеме жасап.
Қытай Тайваньның солтүстігі мен оңтүстігіндегі суларға зымырандар атып, жауынгерлік оқпен 10 сағаттық жаттығу өткізді.
Тайвань қауіпсіздік қызметінің жоғары лауазымды өкілі Reuters агенттігіне Бейжің, шамасы, АҚШ-тың HIMARS зымыран жүйесі секілді жерүсті нысандарына соққы беруді пысықтағанын мәлімдеді.
HIMARS – шамамен 300 шақырымға дейінгі қашықтықта әрекет ете алатын, Қытайдың оңтүстігіндегі жағалау нысандарын зақымдауға қабілетті мобильді артиллериялық жүйе.
Қытайдың ӘТК мен ӘӘК бөлімшелері арал маңында теңіз және әуе нысандарына соққы жасауды модельдеп, суасты қайықтарына қарсы жаттығулар өткізді. Осы уақытта мемлекеттік БАҚ Бейжіңнің технологиялық және әскери басымдығын, қажет болған жағдайда Тайваньды күшпен басып алуға қабілетті екенін көрсететін суреттерді жариялады.
«Әділет миссиясы – 2025» деп аталған бұл жаттығулар АҚШ Тайваньға 11,1 миллиард доллар көлеміндегі рекордтық қару-жарақ пакетін жариялағаннан кейін 11 күн өткен соң басталды. Бұл Қытай Қорғаныс министрлігінің ашуын тудырып, ведомство жауап ретінде әскерилер «батыл шаралар қабылдайтынын» ескерткен еді.
Алғаш рет Қытай әскері бұл жаттығулардың сыртқы араласуды тежеуге бағытталғанын мәлімдеді.
«Тайвань мәселесіне араласуға немесе Қытайдың ішкі ісіне қол сұғуға тырысқан кез келген сыртқы күш Қытай Халық-азаттық армиясының темір қабырғасына соғылып, тас-талқаны шығады», – делінген Қытай үкіметі жанындағы Тайвань істері жөніндегі басқарманың дүйсенбі күні жариялаған мәлімдемесінде.
Осы аптадағы жаттығулар 2022 жылдан бергі алтыншы ірі әскери ойындар саналады және аумағы жағынан ең кең, сондай-ақ Тайваньға бұрын-соңды болмаған деңгейде жақын өткен оқу-жаттығу болды.
Тайвань президенті Лай Чин-дэ Facebook желісіндегі жазбасында алдыңғы шептегі әскерлер аралды қорғауға дайын екенін мәлімдеді, алайда Тайбэй жағдайды ушықтыруға ұмтылмайтынын атап өтті.