Ресей жақын уақытта Эстонияға немесе НАТО-ға мүше кез келген басқа елге шабуыл жасауды жоспарлап отырған жоқ. Бұл туралы 10 ақпан, сейсенбі күні жарияланған Эстонияның Сыртқы барлау департаментінің халықаралық қауіпсіздік жөніндегі жыл сайынғы есебінде айтылған.
Құжаттың кіріспе бөлімінде ведомство директоры Каупо Розин Ресейдің Украинаға қарсы толық ауқымды басқыншылығы басталғаннан кейін Еуропа Кремльді эскалация тәуекелдерін мұқият саралауға мәжбүр ететін шаралар қабылдағанын атап өтті. Сондықтан Эстонияның сыртқы барлауы 2027 жылы да осындай қорытындыға келуі мүмкін, деп қосты Розин.
Ол Ресейдің әскери әлеуетін арттыруы аясында НАТО елдерін қорғанысқа инвестиция салуды жалғастыруға шақырды. «Ресейдің есептеулеріндегі күштер теңгерімі әрдайым біздің пайдамызға болуы тиіс», — деп түйіндеді эстон арнайы қызметінің басшысы.
Ресейдің қорғаныс секторы азаматтық экономиканың қысқаруы есебінен өсіп жатыр
Эстонияның сыртқы барлау деректеріне сәйкес, Ресейдің әскери-өнеркәсіптік кешені (ӘӨК) Мәскеуге қарсы енгізілген халықаралық санкциялардың салдарын сезінуде, бірақ оларды айналып өтуді үйренген. 2021 жылдан бері Ресейдің ӘӨК артиллериялық оқ-дәрі өндірісін 17 еседен астам арттырған. Баяндама авторлары мұны Украинадағы соғыс жалғасып жатқанына қарамастан, Ресейдің жаңа қақтығысқа дайындалып жатқанын көрсетеді деп санайды.
Сонымен қатар Ресей қарулы күштердің барлық түрлері үшін көп мөлшерде ұшқышсыз ұшу аппараттарын өндіруде. Сондықтан құжат авторларының пікірінше, НАТО елдері ықтимал қақтығыс жағдайында Ресейдің құрлықта, әуеде және теңізде дрондарды қолдануы мүмкін екеніне дайын болуы керек.
Баяндама авторлары сондай-ақ Ресейдің қорғаныс секторы құлдырау кезеңіне өткен азаматтық экономиканың қысқаруы есебінен кеңейіп жатқанын атап өтеді. Алайда Эстонияның сыртқы барлау қызметінің бағалауынша, Ресей экономикасының күйреуі әлі де екіталай.