Ресей әскері 29 қарашаға қараған түні Украинаға тағы да жаппай соққы жасады, деп хабарлайды Malim.kz. DW-ге сілтеме жасап.
Жергілікті биліктің мәліметінше, Киев пен Киев облысы дрондармен және авиациялық бомбалармен атқыланды. Днепр мен Харьковте де жарылыстардың даусы естілген.
Киев қалалық әскери әкімшілігінің дерегінше, дрондар украин астанасының кемінде төрт ауданындағы көпқабатты үйлерге тиді. Мысалы, Шевченко ауданында 14 қабатты тұрғын үй, Соломенский ауданында 25 қабатты үй мен жанындағы көліктер, сондай-ақ жеке сектордағы тұрғын үй зақымданған. Святошин ауданында дрон үш қабатты үйге түсті. Днепров ауданында жеті қабатты үйдің бір бөлігі қираған.
КГВА мәліметі бойынша, РФ ұшқышсыз аппараттары Киевтегі ашық аумақтарға да құлаған, көліктер бүлінген. Бірқатар аудандарда өрт шыққан, оқиға орнына жедел қызметтер жіберілді. Киев әкімі Виталий Кличко кемінде жеті адамның жараланғанын, оның ішінде 13 жастағы жасөспірім бар екенін хабарлады.
Ресейдің соққысы Киев облысының Бровары ауданын да шарпыды — онда дрондар бірнеше көпқабатты және жеке үйлерге тиген. Броварыда екі адам жарақат алды, деп хабарлады облыстық әкімшіліктің басшысы Николай Калашник.