Украинаға қарсы агрессивті соғысын жалғастырып отырған Ресей көршілес елдің энергетикалық инфрақұрылымына соққыларды қайта жасап, төрт күн бұрын жарияланған «энергетикалық бітімді» бұзды, деп хабарлайды Malim.kz DW-ге сілтеме жасап.
Бүгін Ресей әскерлері Харьков, Сумы, Днепропетровск және Черкассы облыстарындағы энергетикалық нысандарға шабуыл жасады. Бұл туралы Киевтегі брифингте Украина энергетика министрінің бірінші орынбасары Артем Некрасов мәлімдеді.
Некрасовтың айтуынша, зақымданған энергетикалық нысандарда қалпына келтіру жұмыстары жалғасып жатыр, энергожүйенің тұрақты жұмысын қамтамасыз ету үшін барлық мүмкін шаралар қабылдануда.
Министрлік деректеріне сәйкес, қуат тапшылығы Киевте және Киев облысында да сақталып отыр. Сонымен қатар күрделі ауа райы жағдайларына байланысты Одесса, Николаев және Кировоград облыстарындағы 160-тан астам елді мекен электр энергиясынсыз қалған.
Сондай-ақ Артем Некрасов Днепропетровск облысында энергетика саласының қызметкерлеріне бағытталған қасақана шабуыл жасалғанын мәлімдеді. Оның айтуынша, бір күн бұрын ресейлік дрондар Павлоград ауданындағы «Терновская» шахтасының маңында энергетикалық кәсіпорындардың бірінің қызметтік автобусына соққы берген. Нәтижесінде шахтаның 16 қызметкері қаза тауып, тағы 14 адам жараланған.
2-ақпан күні күндіз энергетикалық DTEK компаниясы Днепропетровск облысындағы көмір кәсіпорнына тәулігіне екінші рет соққы жасалғанын хабарлады. Telegram желісіндегі ақпаратқа сәйкес, шабуыл салдарынан DTEK кәсіпорнының әкімшілік ғимараттары зақымданған.
Өз кезегінде өңірлік электр желілері компаниялары мен DTEK Ресейдің Украина энергожүйесіне жасаған соққылары салдарынан бірқатар өңірде апаттық электр сөндірулер орын алғанын мәлімдеді. Атап айтқанда, Черкассы, Житомир, Чернигов, Сумы облыстарында, сондай-ақ Киев пен Киев облысында электр қуаты уақытша ажыратылған.
Бұған дейін біз Киев пен бірнеше облыста электр, су және жылу уақытша тоқтатылғаны жайында жазған едік.