Сербия президенті Александр Вучич ел Албания, Хорватия және өзін-өзі жариялаған Косово тарапынан ықтимал шабуылға дайындалып жатқанын мәлімдеді, деп хабарлайды Malim.kz.
Srbija danas басылымының жазуынша, мемлекет басшысы бұл туралы RTS телеарнасына берген сұхбатында Тирана, Загреб және Приштина арасындағы «әскери одақ» туралы сұраққа жауап бере отырып айтты.
«Біз олардың шабуылына дайындалып жатырмыз. Олар болашақта еуропалықтар мен орыстар арасында үлкен қақтығыс басталып, Таяу Шығыста одан да күрделі жағдай туындайтын сәтті күтіп отыр», — деді президент.
Оның айтуынша, серб билігі «елді қорғау үшін» қолдан келгеннің бәрін жасап жатыр.
«Біз НАТО елдеріне шабуыл жасай алмаймыз, ал Албания мен Хорватия альянс мүшелері. Олардың жоспары осындай: әлемде жалпы хаос орнайтын қолайлы сәтті күтіп отыр», — деп санайды Вучич.
Президент Сербия азаматтарына «алаңдаудың қажеті жоқ» екенін де атап өтті.
«Сербияда осы үш субъектінің барлығына қарсы тежеу күштері жеткілікті екенін ғана айтамын — бұл оларға нақты белгі беруге жетеді… Сербия азаматтары алаңсыз ұйықтай алады», — деді ол.
Вучичтің сөзінше, Сербия өзінің аумақтық тұтастығын, егемендігін, бостандығын және азаматтарының қауіпсіздігін сақтауға жеткілікті дәрежеде мықты.
Оның пікірінше, Белградқа ешкім шабуыл жасамайды, «себебі олар жауаптың қандай болатынын біледі».