Швейцария үкіметі өткен жылдың соңында Еуропалық Одақ қабылдаған Ресейге қарсы 19-санкциялық пакетке сәйкес айыппұл шараларын қатаңдатты.
«2026 жылғы 25 сәуірден бастап Швейцарияда Ресейдің сұйытылған табиғи газын сатып алуға толық тыйым салынады», — деп мәлімдеді сәрсенбі, 25 ақпанда Берндегі үкімет.
Қазір қолданыстағы сұйытылған табиғи газды жеткізуге арналған ұзақ мерзімді келісімшарттар үшін биылғы жылдың соңына дейін өтпелі кезең қарастырылған.
Еуроодаққа мүше емес Швейцария Мәскеудің Украинаға қарсы соғысы басталғалы бері, яғни шамамен төрт жыл ішінде, Брюссель енгізген Ресейге қарсы бірқатар экономикалық санкцияларды қабылдады.
«Бұл шара Ресейдің қазба отынды сатудан түсетін табысын қысқартуды мақсат етеді. Аталған табыстар айтарлықтай дәрежеде Украинаға қарсы соғысты қаржыландыруға жұмсалып отыр», — деп түсіндірді Швейцария үкіметі.
Берн алдағы күндері күшіне енетін бірқатар қосымша шаралар туралы да жариялады. Атап айтқанда, Ресей азаматтары мен компанияларына кез келген криптовалюта қызметтерін көрсетуге тыйым салынады. Сонымен қатар, Швейцарияның Федералдық кеңесі Еуроодақ елдерінде аккредиттелген ресейлік дипломатиялық персонал үшін Швейцария аумағына кіру және ел арқылы транзитпен өту кезінде міндетті тіркеу тәртібін енгізді.