АҚШ президенті Дональд Трамп Иранға қарсы әскери операцияны кеңейту жоспарын әзірге тоқтатқан, деп хабарлайды Malim.kz РИА-ға сілтеме жасап.
The New York Times басылымының жазуынша, АҚШ президенті Дональд Трамп Иранға қарсы әскери операцияны кеңейту жоспарын әзірге тоқтатқан.
Басылымның мәліметінше, Ақ үй басшысы соғыстың ушығуы АҚШ-тың Patriot зымыранға қарсы қорғаныс жүйелеріне арналған тосқауыл зымырандары мен басқа да оқ-дәрі қорын қауіпті деңгейде азайтып жіберуі мүмкін деп алаңдайды.
Бұл шешім Трамптың кеңесшілері және жоғары лауазымды шенеуніктерімен өткізген кездесуінен кейін қабылданған. Ақпаратқа сәйкес, АҚШ Қарулы күштері штаб бастықтары біріккен комитетінің төрағасы Дэн Кейн президентке мұндай қадамның қауіптері туралы жеке ескерткен.
Сондай-ақ Вашингтонда Таяу Шығыстағы қақтығыстың кеңеюі, Парсы шығанағындағы негізгі одақтастармен қарым-қатынастың нашарлауы, жаһандық экономикаға теріс әсері, сондай-ақ энергетикалық және көші-қон дағдарысының күшеюі мүмкін деген алаңдаушылық бар.
NYT дерегінше, Трамптың жақын айналасындағы шенеуніктердің басым бөлігі әскери эскалацияны тиімді шешім деп санамайды. Олардың пікірінше, жаңа ауқымды соққылар Иранды келіссөз үстеліне қайтармай, керісінше сыртқы қауіпке қарсы елдің ішкі бірлігін күшейтуі мүмкін.