АҚШ президенті Дональд Трамп Вашингтон мен Тегеран соғысты тоқтату және Ормуз бұғазын ашу туралы келісімге жақын қалғанын мәлімдеді, деп хабарлайды Malim.kz DW-ге сілтеме жасап.
Трамптың айтуынша, келісімнің негізгі шарттары едәуір деңгейде келісілген. Қазіргі уақытта құжаттың соңғы тармақтары мен егжей-тегжейі талқыланып жатыр.
Сонымен қатар Иран тарапы келісім жасалған жағдайда да Ормуз бұғазы бақылауда қала беретінін мәлімдеді. Бұл бұғаз әлемдік мұнай және газ тасымалы үшін стратегиялық маңызға ие.
Axios порталының мәліметінше, тараптар әзірлеп жатқан меморандум жобасы атысты тоқтату режимін 60 күнге ұзартуды қарастырады. Осы кезеңде Ормуз бұғазы арқылы кемелер баж салығынсыз өте алады, ал Иран бұғазды миналардан тазартуға міндеттенеді.
Өз кезегінде АҚШ Иран порттарына қойылған блокаданы алып тастап, Иран мұнайын экспорттауға қатысты бірқатар санкциялық жеңілдіктер ұсынуға дайын.
Жобаға сәйкес, Иран ядролық қару жасауға ұмтылмайтынын растауы және уранды байыту бағдарламасын тоқтату мәселесі бойынша келіссөз жүргізуі тиіс. Сондай-ақ жоғары деңгейде байытылған уран қорларын елден шығару мәселесі де қарастырылып отыр.
Ал АҚШ 60 күн ішінде санкцияларды жеңілдету және Иран активтерін бұғаттан босату жөнінде келіссөздер жүргізуге дайын екенін білдірді.