АҚШ президенті Дональд Трамп Иранмен келісімге қол жеткізілмесе, АҚШ Тегеранға қайтадан әуе соққыларын жасауы мүмкін екенін мәлімдеді, деп хабарлайды Malim.kz.
Оның айтуынша, шабуыл жасау туралы шешім қабылдауға өте аз уақыт қалған, бірақ ол кейін бұл қадамды уақытша тоқтатқан.
Ақ үйде журналистер алдында сөйлеген ол Иранның жаңа бейбіт ұсынысына байланысты әскери әрекет кейінге шегерілгенін айтты.
«Мен соққы беру туралы шешім қабылдауға бір сағаттай ғана уақыт қалған еді», — деді Трамп.
Сонымен қатар ол Иран басшылығы келісім жасауға ұмтылып отырғанын, алайда алдағы күндерде мәміле жасалмаса, АҚШ әскери әрекетті қайта бастауы мүмкін екенін ескертті.
«Бұл мәселе екі-үш күннің ішінде шешілуі мүмкін — жұма, сенбі, жексенбі немесе келесі аптаның басы. Біз Иранның жаңа ядролық қаруға ие болуына жол бере алмаймыз», — деді АҚШ президенті.
Бұған дейін Иранның мемлекеттік бұқаралық ақпарат құралдары Тегеран ұсынған бейбіт жоспар барлық қақтығыстарды тоқтатуды, соның ішінде Ливандағы әскери әрекеттерді доғаруды, АҚШ әскерін Иранға жақын аймақтардан шығаруды және америкалық-израильдік қақтығыс салдарынан келген шығын үшін өтемақы төлеуді қарастыратынын хабарлаған.
Иран сыртқы істер министрінің орынбасары Казем Харибабади Тегеран санкцияларды алып тастауды, бұғатталған қаржыны босатуды және АҚШ-тың теңіз қоршауын тоқтатуды талап етіп отырғанын айтқан.
Сарапшылардың пікірінше, ықтимал келісім Ормуз бұғазын қайта ашуға жол ашуы мүмкін. Бұл — әлемдегі мұнай тасымалдайтын ең маңызды теңіз жолдарының бірі.