Иранның Азаматтық авиация басқармасы 18 сәуір таңынан бастап елдің әуе кеңістігінің бір бөлігінің ашылғанын хабарлады. БұлTasnim агенттігі мәлім етті, деп хабарлайды Malim.kz.
18 сәуірде жергілікті уақыт бойынша таңғы сағат 7:00-ден бастап елдің әуе кеңістігінің бір бөлігі ашылған. Мұндай шешім Ұлттық азаматтық-әскери үйлестіру комитетінде жағдайды қарау нәтижесінде, ұшу қауіпсіздігі талаптарын ескере отырып қабылданған көрінеді.
«Осыған сәйкес, сондай-ақ ұшу экипажына арналған хабарламаға (NOTAM) сүйене отырып, елдің әуе кеңістігі мен бірқатар әуежайлар 18 сәуір күні таңғы сағат 7:00-ден бастап ашылды», - деп жазды агенттік басқарма хабарламасын.
Сонымен қатар, әуежайлардың жұмысы әскери және азаматтық қызметтердің дайындығына қарай кезең-кезеңімен қалпына келтірілетіні хабарланды.
Бұған дейін Таяу Шығыстағы қақтығыс басталғаннан кейін Ормуз бұғазы арқылы алғашқы круиздік кеме өткені белгілі болған еді. Мәліметке сәйкес, Мальта туымен жүрген, жолаушыларсыз Оманға бағыт алған лайнер жұма күні Дубайдан шығып, 40 күннен астам уақыт айлақта тұрған.