АҚШ астанасы Вашингтонда CRJ700 жолаушылар ұшағы тікұшақпен соқтығысып, Рейган атындағы әуежайға жақын жердегі өзенге құлады. Бұл жөнінде "Америка дауысына" сілтеме жасап azattyq.org жазды.
Оқиға орнында іздеу-құтқару жұмысы жүріп жатыр.
American Airlines әуе компаниясындағы дереккөзге сүйенген Reuters ұшақтың бортында 64 адам болғанын жазды. Зардап шеккендер туралы ақпарат толықтырылып жатыр. Reuters-тің жазуынша, тікұшақ бортында үш әскери қызметкер болған. Олар туралы ақпарат әзірге жарияланбады.
Судан 19 мәйіт шығарылған. Әзірге, тірі қалғандар табылмады,- деп жазды BBC сайты.
АҚШ азаматтық авиациясы федералдық басқармасының хабарлауынша, сәрсенбі күні кешкі сағат 9 шамасында PSA Airlines әуекомпаниясының жолаушылар ұшағы қонуға бет алғанда Sikorsky H-60 тікұшағымен соқтығысқан.
Ұшақ American Airlines рейсін атқарған және Вичита (Канзас) қаласынан Вашингтонға ұшқан.
Фото: pixabay