Вьетнамда туристер отырған қайық аударылып, 30-дан астам адам қаза болды, деп хабарлайды Malim.kz Азаттыққа сілтеме жасап.
Вьетнамның солтүстігінде Халонг мүйісінде туристер мінген қайық аударылып, кемінде 34 адам қаза болды. 11 адам құтқарылған, 8 адам із-түзсіз жоғалған. Қаза болғандар арасында кемінде 8 бала бар. Қайықта барлығы 48 жолаушы және экипаждың бес мүшесі болған.
Ақпаратқа қарағанда, қайық қатты желдің салдарынан аударылған. Іздеу-құтқару жұмыстары жалғасып жатыр.
Ақпарат құралдарының жазуынша, қайықтағы туристердің көбі ел астанасы Ханойдан келген. Онда шамамен 20 бала болған деп айтылады.
Халонг мүйісі – Вьетнамда адам көп баратын танымал орындардың бірі, жыл сайын оған миллиондаған адам саяхаттап барады.
Фото: AFP