Жамбыл облысында таңғаларлық жағдай тіркелді. Қайтыс болды деп танылып, жерленді деген әйел бір айдан кейін үйіне аман-есен оралған, деп хабарлайды Malim.kz.
Оқиғаның мән-жайы
1953 жылы туған әйел 2024 жылдың тамыз айында Тараз қаласына әпкесінің үйіне көшіп барған. 2025 жылғы Құрбан айттан кейін ол хабарсыз кеткен. Туыстары полицияға жүгінген.
2025 жылдың тамызында ауыл маңындағы дала аумағынан әйел адамның мәйіті табылып, осы факті бойынша қылмыстық іс қозғалған. Талапкер табылған мәйітті жоғалған анасы деп танып, соның негізінде өлім туралы акт рәсімделіп, куәлік берілген.
Әйелдің күтпеген оралуы
Алайда бір ай өткен соң, 2025 жылдың қыркүйегінде әйел Жамбыл ауданының Қостөбе ауылындағы ағасының үйіне келген. Оның тірі екені белгілі болған соң, қызы анасының құқықтық мәртебесін қалпына келтіру үшін сотқа жүгінген.
Әйелдің айтуынша, Құрбан айттан кейін Айша бибі ауылына барып, пияз теру жұмысына кіріскен және сол жақтағы үйде тұрған. Кейін зейнетақы төлемдері тоқтағанын байқап, Таразға келгенде өзінің "қайтыс болған" деп тіркелгенін білген. Туыстары оның кейде ұзақ уақытқа ескертусіз кетіп қалатын әдеті бар екенін айтқан.
Сараптама нәтижесі және сот шешімі
Жамбыл аудандық соты табылған мәйіттің басқа адамға тиесілі екенін анықтады. Полиция эксгумация жүргізіп, қосымша сот-медициналық және генетикалық сараптама тағайындаған. Нәтижесінде марқұмның нақты тұлғасы айқындалып, өлім фактісі бойынша қозғалған қылмыстық іс тоқтатылған.
Сот талап арызды қанағаттандырып, өлім туралы куәлікті жарамсыз деп таныды. Өлім туралы акт жазбасының күші жойылып, шешім заңды күшіне енді.