Астанада зейнетақы жинақтарына қатысты алаяқтық жасады деген күдікпен 28 жастағы ер адам ұсталды, деп хабарлайды Malim.kz.
Ол азаматтарға қаражатты қолма-қол шешіп беруге көмектесетінін айтып, тұрғынның ақшасын иемденіп, кейін байланысқа шықпай кеткен.
Тергеу барысында күдіктінің жәбірленушіден 250 мың теңге алғаны анықталды.
Алайда барлық ақшаны иеленгеннен кейін ер адам уәдесін орындамай, ізін суытқан. Жедел-іздестіру шаралары нәтижесінде күдіктінің жеке басы анықталып, ұсталды.
Полицейлердің мәліметінше, соңғы уақытта зейнетақы жинақтарын шешіп беруге, әлеуметтік төлемдер мен жеңілдіктер рәсімдеуге көмектесеміз деген сылтаумен жасалатын алаяқтық деректері көбейген.
Осыған байланысты полиция азаматтарды сақ болуға шақырады: бейтаныс адамдарға жеке деректер мен банк картасының мәліметтерін бермеу, күмәнді қызметтер үшін алдын ала төлем жасамау және «ақшаны тез шығарып береміз» деген уәделерге сенбеу қажет.