Қазақстанда әлеуметтік желі Threads-те армияда өзіне қатысты жасалды делінген жыныстық зорлық туралы резонанс тудырған жарияланымның авторы анықталды. Бұл туралы Қорғаныс министрлігі хабарлады, деп хабарлайды Malim.kz Tengrinews.kz-ке сілтеп.
Ақпан айында Threads әлеуметтік желісінде анонимді хабарлама жарияланған. Оның авторы командирі тарапынан өзіне жыныстық зорлық жасалғанын мәлімдеген. Бұл жарияланым желіде тез таралып, мыңдаған қаралым мен пікір жинап, қолданушылар арасында қызу талқылауға себеп болды.
Кейінірек жарияланым авторы өзінің парақшасында қаражат жинау туралы хабарлады. Ол жиналған ақша шетелге көшуге және «қауіпсіздік мақсатында» баспана жалдауға қажет екенін айтқан. Пайдаланушы түскен қаражат туралы есептерді де жариялап отырған. Соңғы хабарламаларының бірінде 329 230 теңге жиналғанын мәлімдеген.
Tengrinews.kz редакциясы осы жағдайға байланысты Қорғаныс министрлігіне ресми сұрау жолдаған. Ведомствоның хабарлауынша, тексеру барысында жазба авторының жеке басы анықталып, оның келтірген мәліметтері расталмаған.
«Құзыретті органдар жан-жақты тексеру жүргізді. Жағдайдың мән-жайын анықтау барысында өтініш авторының жеке басы белгілі болды, сондай-ақ оның мәлімдеген деректерінің шындыққа сәйкес келмейтіні анықталды. Бұл оқиға шындыққа жанаспайды және Қазақстан Республикасының Қарулы күштері қатарындағы әскери қызметті қаралау мақсатында әдейі таратылған», — делінген Қорғаныс министрлігінің жауабында.
Ведомствоның мәліметінше, материалдар процессуалдық шешім қабылдау үшін ішкі істер органдарына жіберілген.
«Қолданыстағы заңнамаға сәйкес, көрінеу жалған ақпарат таратқаны үшін қылмыстық жауапкершілік қарастырылғанын еске саламыз», — деп атап өтті министрлік.
Сондай-ақ ведомство әлеуметтік желі қолданушыларын тексерілмеген ақпаратты жарияламауға және таратпауға, ресми дереккөздерге сенуге шақырды.