АҚШ Дүниежүзілік экономикалық форум аясында Гренландияны бақылауға алу мәселесін көтермек. Бұл туралы президент Дональд Трамп Флоридада журналистер алдында сөйлеген сөзінде мәлімдеді. «Біз оған (Гренландияға – ред.) иелік етуіміз керек болады. Дания оны қорғай алмайды», – деп Reuters агенттігі сейсенбі, 20 қаңтар күні таңертең америкалық басшының сөзін келтіреді.
«Мен Данияның басшыларын білемін. Олар өте жақсы адамдар, бірақ олар тіпті ол жаққа (Гренландияға – ред.) бармайды», – деп қосты Трамп.
Нақтылай айтқанда, АҚШ президенті Давоста өтетін форумда Гренландия мәселесін «мүдделі тараптармен» талқылағысы келетінін жеткізді. Дональд Трамптың Швейцарияда өтетін ДЭФ-ке 21 қаңтар күні келуі күтілуде. Сол күні ол форумда сөз сөйлеуі тиіс.
Бұған дейін Трамп бірнеше рет АҚШ-тың Гренландияны бақылауға алуы қажет екенін мәлімдеген. Оның айтуынша, Арктика аймағында Ресей мен Қытайдың сүңгуір қайықтарының белсенділігі артқан.
Трамптың Гренландияны Марк Рюттемен талқылауы
Сол күні, 20 қаңтарда, АҚШ президенті Гренландия тақырыбын НАТО-ның бас хатшысы Марк Рюттемен телефон арқылы талқылағанын айтты. «Гренландия ұлттық әрі жаһандық қауіпсіздік үшін қажет. Артқа шегінуге жол жоқ – бұған барлығы келіседі!» – деп жазды ол осыған байланысты Truth Social әлеуметтік желісіндегі парақшасында.