Испания Италиядан әуе және теңіз жолы арқылы келетін азаматтарға шекаралық бақылау енгізді, деп хабарлайды Malim.kz BBC-ге сілтеме жасап.
Бұл шешім екі Еуропалық одақ елінің арасында миграция мәселесіне байланысты шиеленістің күшеюінен кейін қабылданды.
Испания билігінің мәлімдеуінше, уақытша бақылау кезінде төлқұжат, азаматтық және үшінші ел азаматтарының визалары тексеріледі. Шектеу бір айға — 7 қыркүйекке дейін енгізілді. Испания билігі бұл шешімді «заңсыз мигранттар тарапынан қысымның күшеюімен» түсіндірді.
Мадридтің бұл қадамы Италияның бір апта бұрын Испаниядан келетін үшінші ел азаматтарына осындай бақылау енгізуіне жауап болды. Рим мұндай шешімді Мароккодан Испанияның Африкадағы Сеута эксклавына 70 мыңнан астам мигранттың келуімен байланыстырған.
Италия Шенген келісімінің ішкі шекаралар арқылы еркін жүріп-тұру қағидатын уақытша шектеп, Сеутаға келген мигранттардың кейін Италияға өтуіне жол бермеуді көздегенін мәлімдеді.
Ал Испания билігі Италияның бұл уәжін «негізсіз» деп атады. Мадридтің мәлімдеуінше, Сеутаға келген мигранттардың Шенген аймағына өту мүмкіндігі болмаған, себебі қаланың ерекше эксклавтық мәртебесі бар.
Испания Ішкі істер министрлігінің мәліметінше, Сеутаға келген марокколықтардың басым бөлігі елге қайтарылды. Осы аптада қалада шамамен 2 мың адам қалған. Олардың көпшілігі — шілде айының соңында Мароккодан теңіз арқылы келген жастар.