2025 жылдың наурыз айында қазақстандықтар мереке және демалыс күндерін қосқанда, 14 күн демалады, деп хабарлайды Malim.kz.
Бұл айда екі бірдей айтулы мереке тойланады: 8 наурыз – Халықаралық әйелдер күні және Наурыз мейрамы.
"ҚР мерекелер туралы" заңының 3-бабына сәйкес, 8 наурыз – Халықаралық әйелдер күні және Наурыз мейрамы – мемлекеттік мерекелер. Ал аталған заңның 5-бабына сәйкес, Қазақстан Республикасында мемлекеттік мереке тойланатын күндер демалыс күндері болып саналады.
Халықаралық әйелдер күнінде бес күндік жұмыс аптасындағы қазақстандықтар үш күн – 8, 9 және 10 наурызда демалады.
Ал алты күндік жұмыс аптасында 8 және 9 наурыз – демалыс күндері, ал 10 наурыз жұмыс күні болып саналады.
Биыл Наурыз мейрамы 21-23 наурыз аралығында тойланады, бірақ 22 наурыз сенбіге, 23 наурыз жексенбіге сәйкес келетіндіктен, демалыс күндері дүйсенбі мен сейсенбіге қосылып, қазақстандықтар Наурыз мейрамында бірден бес күн – 21, 22, 23, 24 және 25 наурыз күндері демалады.
Алты күндік жұмыс аптасымен істейтіндер үшін сейсенбі, яғни 25 наурыз – жұмыс күні, ал 21, 22, 23 және 24 наурыз – демалыс күндері болады.
Ал 2025 жылы Қазақстанда барлығы 119 демалыс күні болады. Демалыс күндерінің саны бойынша ең "ұзақ" ай наурыз – 14 күн, ал ақпан мен сәуір демалыс күндері (8) ең аз ай.
Фото: istockphoto.com