Павел Таланкин мен Дэвид Боренштейннің «Путинге қарсы мырза Ешкім» (Mr. Nobody against Putin, 2025) фильмі, Ресей мектептеріндегі әскери насихат туралы баяндайтын деректі туынды, Америкалық киноакадемияның «Оскар» сыйлығын «ең үздік деректі фильм» номинациясы бойынша жеңіп алды.
98-ші «Оскар» марапаттау рәсімі жексенбі күні, 15 наурызда, Dolby Theatre театрында өтті.
Боренштейн бұл картинаны елді қалай жоғалтып алуға болатыны туралы фильм деп атады.
«Бұл кадрлармен жұмыс істеген кезде біз елді сансыз ұсақ қатысушылық әрекеттері арқылы жоғалтып алуға болатынын көрдік. Бірақ, бақытымызға қарай, тіпті “ешкім” деп саналатын адам да сіз ойлағаннан әлдеқайда күшті болуы мүмкін», – деді ол.
Ал Таланкин сахнадан сөйлеген сөзінде соғысты тоқтатуға шақырды.
«Төрт жыл бойы біз жұлдызды аспанға қарап, ең маңызды тілегімізді тілеп келеміз. Өте маңызды тілек. Бірақ кейбір елдерде жұлдыздардың орнына аспаннан бомбалар түсіп, дрондар ұшады. Біздің болашағымыз үшін, барлық балаларымыздың болашағы үшін, барлық соғыстарды тоқтатайық. Қазір», – деді ол.
Педагог-ұйымдастырушының бейнежазбалары
Фильмнің негізіне Челябі облысындағы Қарабаш қаласындағы бір мектептің педагог-ұйымдастырушысы Таланкин түсірген бейнежазбалар алынған. Бұл жазбалар 2022 жылдың ақпанында Ресейдің Украинаға толық ауқымды басқыншылығы басталғаннан бері түсірілген.
Таланкиннің міндетіне мектептегі түрлі іс-шараларды – салтанатты саптар, байқаулар және ашық сабақтарды – бейнетаспаға түсіру кірген.
2024 жылдың жазында Таланкин екі жыл бойы түсірілген материалдарды алып, Ресейден кетіп қалды, содан кейін ол фильмді америкалық режиссер Боренштейнмен бірге монтаждады.
Таланкин – Ресей мектептеріндегі атмосфера туралы
Фильмнің премьерасы 2025 жылдың 25 қаңтарында АҚШ-тағы тәуелсіз кинофестивалі – Sundance Film Festival аясында өтті. Сол жерде фильм қазылар алқасының арнайы жүлдесін алды.
Ал 22 ақпанда, Лондонда өткен BAFTA Awards сыйлығының 79-шы марапаттау рәсімінде «Путинге қарсы мырза Ешкім» «ең үздік деректі фильм» аталымында жеңімпаз атанды.
DW-ге берген сұхбатында Таланкин, мектептің педагог-ұйымдастырушысы ретінде, соғыс басталғаннан кейін мектептегі риториканың қалай өзгергенін тіркегенін айтты. Ол 24 ақпандағы күйзеліс туралы, Білім министрлігінен келген нұсқаулар жайлы және төрт жыл ішінде Ресей мектептеріндегі атмосфераның қалай өзгергені туралы әңгімеледі.