Иранның Сарапшылар кеңесі Әли Хаменейдің ұлы Моджтабаны елдің жаңа жоғарғы жетекшісі етіп таңдады, деп хабарлайды Malim.kz Iran International дерегіне сілтеп.
Басылымның жазуынша, шешім Ислам революциясы сақшылары корпусының қысымымен қабылданған.
Бұл шешім әзірге ресми түрде жария етілмеген. Жаңа жоғарғы жетекші туралы хабар Әли Хаменейді жерлеу рәсімінен кейін ғана ресми айтылуы мүмкін. Осы жайттың өзі Ирандағы билік ауысуының ашық емес, жабық саяси сценариймен жүріп жатқанын аңғартады.
Моджтаба Хаменей 55 жаста, марқұм жетекшінің екінші ұлы. Ол ресми түрде жоғары мемлекеттік лауазым атқармағанымен, Ирандағы қауіпсіздік құрылымдарына өте жақын тұлға саналады. Сарапшылар оны көп жылдан бері көлеңкедегі ең ықпалды адамдардың бірі ретінде атап келген.
Моджтабаның басты артықшылығы, оның Ислам революциясы сақшылары корпусымен бұрыннан қалыптасқан байланысы. Басылым оны әкесінің кеңсесі - «Бейтті» кемінде соңғы жиырма жыл бойы іс жүзінде басқарып келген, жүйенің ішкі тетіктерін толық білетін адам ретінде сипаттайды. Сондықтан дәл қазір Иран билігі үшін ол сыртқы соғыс қысымында тәртіп пен сабақтастықты сақтай алатын ең ыңғайлы фигура ретінде қарастырылған.
Бұл шешімнің қалыпты саяси ауысым емес, соғыс жағдайындағы шұғыл таңдау екені ерекше айтылады. Яғни Тегеран үшін қазір басты мәселе - заңдық рәсімнен бұрын билік тізгінін жоғалтпай, күштік құрылымдардың басқаруын бір қолға шоғырландыру. Сол себепті Моджтаба Хаменейдің таңдалуы Ирандағы биліктің бұрынғыдан да жабық әрі қатаң сипатқа ауысуы мүмкін деген болжамды күшейтті.
Бұған дейін Иранның Жоғарғы көшбасшысы ретінде Әли Хаменейдің ұлы таңдалғанын жаздық.