Белгілі әнші Жігер Ауыпбаев өзінен 15 жас кіші Мумина есімді қызбен екінші рет шаңырақ көтерді. Өнер иесі қуанышты жаңалығын әлеуметтік желідегі парақшасында бөлісті, деп хабарлайды Malim.kz.
Ұзату тойдан тараған видеолар желі қолданушыларының қызу талқысына түсті. Кадрларды көрген кейбір оқырмандар әншінің жарының аяғы ауыр болуы мүмкін деген болжам айтты.
Желіде түрлі пікір жазғандар көбейген соң, Муминаның өзі бұл әңгімеге жауап берді. Ол өзіне қатысты айтылған сөздерді жоққа шығарып, көпшілік алдында ақталуды қажет деп санамайтынын жеткізді.
"Адамның алдында ақталмаймын. Алланың алдында арым таза! "Жүкті болып тұрмысқа шыққан" деген секілді өз ақыретіне бейжай қарайтын хэйтерлеріме айтарым: Аллаға сансыз шүкір, ата-анамның берген тәрбиесін аяққа таптайтын арсыз жан емеспін. Ақыреттік амал дәптерлеріңізді қардай амалға толтырсаңыздар да, өздеріңіз білесіздер. Ал бізге шынайы бақыт тілеп жатқан жандарға алғысым шексіз", – деп жазды ол.
Айта кетейік, Жігер Ауыпбаевтың екінші рет шаңырақ көтергені желіде көп талқыланып жатыр. Әншінің қуанышына бір топ оқырман құттықтау жазса, енді бірі түрлі пікір білдірген.
Еске сала кетейік, Жігер Ауыпбаев әлеуметтік желідегі парақшасында сүйіктісіне сөз салған сәтінен видео бөліскен. Сондай-ақ Жігер Ауыпбаев әлеуметтік желіде өзінен 15 жас кіші сүйіктісімен бірге түскен видеоны жариялап, көптің назарын өзіне аударған.
Жігер Ауыпбаев кім?
Жігер Ауыпбаев – қазақ эстрадасында өзіндік орны бар танымал әнші. Ол тыңдарманға әуезді әндерімен, лирикалық туындыларымен және ерекше орындау мәнерімен жақсы таныс.
Өнер иесі 1987 жылы 3 мамырда Алматы облысы Райымбек ауданына қарасты Кеген ауылында дүниеге келген. Бала күнінен өнерге жақын болып өскен Жігер 2005 жылы туған ауылындағы мектепті тәмамдаған. Кейін Жүсіпбек Елебеков атындағы эстрада және цирк колледжінде білім алып, кәсіби сахнаға алғашқы қадамын жасады.
Колледж қабырғасында ол вокал, сахна мәдениеті, актерлік шеберлік секілді өнер адамына қажетті бағыттарды меңгерді. Әншінің көпшілікке кеңінен танылуына 2007 жылы құрылған "Меломен" тобы әсер етті.
Жігер Ауыпбаев бұл топта Қайрат Мырзаханов, Ролан Қазретов және Ғабит Әбілдаевпен бірге өнер көрсетті. "Меломен" тобы қазақ тілінде ән айтып, аз уақыттың ішінде тыңдарманның сүйікті ұжымдарының біріне айналды.
Топтың "О, махаббат", "Арман шағала", "Келеді кездескім" секілді әндері кезінде көпшілік арасында кең таралып, хитке айналды. Осы ұжым арқылы Жігер сахналық тәжірибесін шыңдап, вокалдық мүмкіндігін танытты.
Кейін әнші топ құрамынан шығып, жеке шығармашылығын дамытуға кірісті. Жеке орындаушы ретінде ол көбіне лирикалық бағыттағы әндерге ден қойды. Оның шығармаларында махаббат, сағыныш, өмір, достық, ішкі толғаныс пен адамдық сезім тақырыптары жиі көрініс табады.
Жігер Ауыпбаевтың репертуарында "Жоғал әрі", "Ұлың маған ұқсаған", "Көкжалдар рухы", "Кішкентай қыз", "Жаман досым" секілді әндер бар. Оның орындау мәнерінде эстрадалық вокал мен қазақы әуез үйлесім тапқан.
Әнші сахнада сезімге құрылған шығармаларды шынайы жеткізуімен ерекшеленеді. Ол топ құрамында да, жеке орындаушы ретінде де өз тыңдарманын қалыптастыра алды.
Бүгінде Жігер Ауыпбаев қазақ шоу-бизнесіндегі есімі көпшілікке таныс өнер иелерінің бірі. Ол шығармашылығын жалғастырып, қазақ эстрадасындағы заманауи лирикалық бағыттың өкілі ретінде танылып келеді.