«КМК Мұнай» компаниясының жұмысшылары президент Қасым-Жомарт Тоқаевқа үндеу жасады.
Әлеуметтік желі арқылы тараған видео үндеуде мұнайшылар жалақыларын көтеруді талап етеді.
«Біз Ақтөбе облысы Темір ауданында орналасқан «КМК Мұнай» компаниясының қарапайым жұмысшыларымыз. Біз адал еңбегімізбен тауып отырған жалақымызды 100 пайызға өсіруді сұраймыз. Қаңтардың 12-і күні біз «КМК Мұнай» және облыс басшылығына үндеу жасадық, бірақ олар біздің талаптарымызды орындағылары келмейді», - дейді мұнайшылар бейнеүндеуде.
Мұнайшылардың сөзінше, жұмысшылардың жалақысын өсіруге компанияның экономикалық мүмкіндіктері жеткілікті.
«Біздің компаниямыз Ақтөбе олысындағы көшбасшы мекемелердің бірі. Біз жыл сайын жоспарды артығымен орындаймыз. Бірақ, жалақымыз өзге компаниялармен салыстырғанда өте төмен. Пандемия уақытында азық-түлік бағасы бірнеше есеге қымбаттады. Айлығымыз не несиеге, не азық-түлікке жетпейді. Өзіңіз білетіндей, Ақтөбе облысының мұнайшылары ең төменгі жалақыны алады. Ол мұғалім, дәрігер және зейнеткерлердікінен де аз. Осы мәселені шешуіңізді сұраймыз. Біз қаңтардың 25-інен бастап жұмысқа шықпаймыз деп шештік. Құрметті ҚР президенті Қасым-Жомарт Кемелұлы! Біз сізден ұжымдық мәселемізді шешіп, компанияға тексеріс жіберуіңізді сұраймыз», - дейді жұмысшылар.
«КМК Мұнай» акциясы Панамада тіркелген «Yukon Energy Holding S.A» және қытайлық «СНПС – Ақтөбе мұнай газ» компанияларына тиесілі.
MalimBlocks
