Әнші Жазира Байырбекова Тұрсынбек Қабатов пен Мөлдір Мұқанның арақатынасына қатысты пікір білдірді. Өнер иесі бұрынғы ерлі-зайыпты балалардың қуанышты сәттерінде бірге көрінсе деген тілегін айтты, деп Malim.kz тілшісі kznews.kz сайтына сілтеме жасап хабарлайды.
Жазира Байырбекова Мөлдір Мұқанованың үш баласына арнап ұйымдастырған мерекелік кешіне қонақ ретінде қатысқан. Сол жерде әнші бұрынғы жұптың балалары үшін жақсы қарым-қатынасты сақтағанын қалайтынын жеткізді.
"Мөлдір мен Тұрсынбек екеуі де тойда болса екен. Ең болмаса дос ретінде, балалардың алдында, олардың әр қуанышында бірге болса екен. Бірге көрсек екен деп армандап отырмын", – деді ол.
Әншінің айтуынша, ол Тұрсынбек Қабатовты да, Мөлдір Мұқанды да сыйлайды әрі екеуіне де құрметпен қарайды. Сондықтан олардың жеке өміріндегі жағдайға қарамастан, балаларының болашағы мен көңілі үшін ортақ тіл табысқанын қалайды.
"Тұрсынбекті де, Мөлдірді де құрметтеймін, сыйлаймын. Екеуі де өте жақсы адамдар. Шын жүректен балалары үшін бас қосып тұрса екен деп тілеймін", – деді Жазира Байырбекова.
Өнер иесінің бұл пікірі желі қолданушылары арасында қызу талқыланды. Көпшілік ата-ананың қандай жағдайда да балаларының қуанышында қатар болғаны маңызды екенін айтып, әншінің сөзімен келісетіндерін жазды.
Еске сала кетейік, Жазира Байырбекова өміріндегі маңызды өзгерісті көпшілікке жария еткен еді. Сондай-ақ Жазира Байырбекова әлеуметтік желідегі парақшасында келініне берілген қалың мал көлеміне байланысты туындаған пікірталасқа өз көзқарасын білдірген болатын.
Жазира Байырбекова кім?
Жазира Байырбекова – қазақ эстрадасындағы көпшілікке кеңінен танымал әншілердің бірі. Толық аты-жөні – Жазира Сайлауқызы Байырбекова. Ол 1978 жылы 30 қыркүйекте қазіргі Түркістан облысы аумағында дүниеге келген. Бала кезінен өнерге жақын болып өскен Жазира домбыра тартып, ән айтуға ерекше қызығушылық танытқан. Мектеп қабырғасында жүрген кезінен-ақ түрлі өнер байқауларына қатысып, сахнаға ерте бейімделген.
Ашық деректерге сүйенсек, Жазира Байырбекова 1992 жылы, небәрі 14 жасында "Тамаша" ойын-сауық отауында өнер көрсеткен. Осы кезеңнен бастап жас әнші көрерменге таныла бастады. Кейін ол әнші Жанболат Ербатыровпен шығармашылық жұп құрып, қазақ эстрадасындағы ең танымал дуэттердің біріне айналды. Жанболат пен Жазираның орындауындағы әндер халық арасында кеңінен таралып, тыңдарманның сүйікті туындыларына айналды.
Жазира Байырбекованың өнері шынайылығымен, қарапайымдылығымен және ұлттық болмысқа жақындығымен ерекшеленеді. Оның репертуарында отбасы, махаббат, сағыныш, адалдық, адамгершілік және өмірлік құндылықтар туралы әндер көп. Әнші сахнада қазақы тәрбиені, отбасылық сыйластықты және ұлттық құндылықтарды дәріптеп келеді.
Өнер иесі тек сахнада ғана емес, әлеуметтік желіде де белсенді. Ол оқырмандарымен жеке өмірі, отбасы, шығармашылығы және қоғамдағы түрлі мәселелер туралы ой бөлісіп отырады. Көпшілік Жазираны ашық мінезі, қарапайым болмысы және отбасы құндылықтарын жоғары қоятыны үшін құрметтейді.
Жазира Байырбекова мен Жанболат Ербатыров ұзақ жылдар бойы өнерде де, өмірде де бірге келе жатқан танымал жұптардың бірі саналады. Олардың отбасы мен шығармашылығына қатысты жаңалықтар әрдайым көпшіліктің назарында.
Бүгінде Жазира Байырбекова қазақ сахнасындағы өз орнын сақтап қалған, тыңдарманы тұрақты өнер иелерінің бірі. Оның әндері той-думан, мерекелік кештер мен отбасылық басқосуларда жиі шырқалады. Жалпы, Жазира Байырбекова – қазақ өнерінде өзіндік қолтаңбасы қалыптасқан, халыққа жақын, ұлттық құндылықтарды насихаттап жүрген танымал әнші.