Қазақстандық танымал әнші Жазира Байырбекова өміріндегі маңызды өзгерісті көпшілікке жария етті. Өнер иесі енді ресми түрде басқа текпен жүретінін айтты, деп хабарлайды Malim.kz.
Бұл туралы әнші әлеуметтік желідегі парақшасында жазды. Ол көпшілікке бұрыннан таныс "Байырбекова" тегінен бас тартып, атасының есімін таңдағанын жеткізді.
"Менің атам – Ыса! Менің аты-жөнім – Жазира Ыса", – деп жазды әнші.
Жазираның бұл мәлімдемесі желі қолданушылары арасында қызу талқыланып жатыр. Бірі әншінің атасының атын ұлықтап, қазақы дәстүрге сай шешім қабылдағанын қолдаса, енді бірі жылдар бойы елге танылған "Жазира Байырбекова" есіміне үйреніп қалғанын жазуда.
Әзірге әнші тегін дәл қазір не себепті өзгерткенін ашып айтқан жоқ. Ол тек атасының есімін мақтанышпен атап, бұдан былай өзін Жазира Ыса деп таныстыратынын білдірді.
Еске сала кетейік, Жазира Байырбекова әлеуметтік желідегі парақшасында келініне берілген қалың мал көлеміне байланысты туындаған пікірталасқа өз көзқарасын білдірген еді. Сондай-ақ ол тойдан кейін отбасындағы қызықты сәттерін бөлісіп, келіні Асылыға айтқан кеңесін бөліскен болатын.
Жазира Байырбекова кім?
Жазира Байырбекова – қазақ эстрадасындағы танымал әншілердің бірі. Оның толық аты-жөні – Жазира Сайлауқызы Байырбекова. Ол 1978 жылы 30 қыркүйекте қазіргі Түркістан облысы аумағында дүниеге келген. Жазира бала кезінен өнерге жақын болып, домбыра тартып, ән айтуға қызыққан. Мектепте оқып жүрген жылдары түрлі байқауларға қатысып, сахнаға ерте бейімделді.
Ашық деректерде оның 1992 жылы, 14 жасында "Тамаша" ойын-сауық отауында өнер көрсеткені айтылады. Осы кезеңнен бастап ол көрерменге таныла бастады. Кейін Жазира Байырбекова әнші Жанболат Ербатыровпен шығармашылық жұп құрып, қазақ эстрадасында өзіндік орны бар дуэтке айналды. Жанболат пен Жазираның орындауындағы әндер көпшілік арасында кең таралып, халықтың сүйікті туындыларына айналды.
Әншінің өнері қарапайымдылығымен, ұлттық болмысқа жақындығымен және шынайы орындау мәнерімен ерекшеленеді. Ол сахнада көбіне отбасы, махаббат, сағыныш, адамгершілік және өмірлік құндылықтар туралы әндерді орындайды.
Жазира Байырбекова тек әнші ғана емес, әлеуметтік желіде де белсенді өнер иесі ретінде танымал. Ол жеке өмірі, отбасы, өнері және қоғамдағы түрлі тақырыптар туралы ойларын оқырмандарымен бөлісіп отырады. Көпшілік оны ашық мінезі, қазақы тәрбиесі және отбасылық құндылықтарды дәріптейтіні үшін құрметтейді. Жазира мен Жанболат ұзақ жылдар бойы өнерде де, өмірде де бірге келе жатқан танымал жұптардың бірі саналады. Олардың отбасы туралы жаңалықтары да оқырмандар мен көрермендердің назарынан тыс қалмайды. Жазира Байырбекова жылдар өте келе өз тыңдарманын жоғалтпай, сахнадағы орнын сақтап келеді. Оның әндері әсіресе той-думан, мерекелік кештер мен отбасылық басқосуларда жиі шырқалады. Жалпы, Жазира Байырбекова – қазақ өнерінде өзіндік қолтаңбасы бар, халыққа жақын әнші әрі ұлттық құндылықтарды дәріптеп жүрген өнер иесі.
