Димаш Құдайбергеннің белгілі айтыс ұйымдастырушысы, ақын Жүрсін Ерманға сәлем берген сәті әлеуметтік желіде қызу талқыланды. Кейбір желі қолданушылары Жүрсін Ерманның әншіге бата бермегенін айтып, түрлі пікір білдірген еді, деп хабарлайды Malim.kz.
Осы жағдайға қатысты Димаштың анасы, әнші Света Айтбаева түсініктеме берді. Оның пікірін журналист Ербол Мәндібек Facebook парақшасында жариялады.
Света Айтбаеваның айтуынша, Димаш үлкен кісіге құрмет көрсетіп, әдеттегідей сәлем берген. Ол Жүрсін Ерманға арнайы бата алу үшін бармаған.
"Біздің үйдің балалары ата-әженің бауырында өскен балалар. "Үлкен кісі көрсең, жүгіріп барып сәлем бер!" дегенді естіп өсті. Бұл жағдай әуежайда болған оқиға. Тіркеуден өтіп, ішке кіріп келе жатқанда Жүрсін аталарына сәлем берді, арнайы бата алуға барып тұрған жоқ", – деді әншінің анасы.
Сондай-ақ Света Айтбаева ақынның жолдан шаршауы немесе денсаулығына байланысты өзін жайсыз сезінуі мүмкін екенін атап өтіп, бұл жағдайға қатысты артық әңгіме айтпауға шақырды.
"Ол кісі де жолдан шаршап отырған болар. Денсаулығы да сыр беріп жүргенін білесіздер, артық әңгіме айтпаған жөн. Қазақтың өнеріне қызмет еткен тұлға ғой, ең алдымен сол еңбегін бағалаймыз. Димашқа бар қазақтың пейілі дұрыс, елдің батасымен қанаттанып жүрген бала ғой. Атасына сәлем берді, бастысы – осы", – деді Света Айтбаева.
Журналист Ербол Мәндібек әншінің анасының пікірін бөлісіп, оның ұстанымын жоғары бағалады.
"Менің Жүрсін ата туралы жазған постыма қалдырған пікірі. Өте дұрыс айтады. Тектілік деген осы, ағайын", – деп жазды журналист.
Еске сала кетейік, Қатонқарағайда концерт берген Димаш Құдайберген өнер кешінен кейін айтыстың абызы Жүрсін Ерманға арнайы барып, сәлем бергенін жазып едік.
Димаш Құдайберген кім?
Димаш Құдайберген – қазақ өнерін халықаралық деңгейде танытып жүрген танымал әнші. Ол ерекше дауыс мүмкіндігімен, жоғары вокалдық шеберлігімен және сахнадағы өзіндік стилімен әлем тыңдармандарының сүйіспеншілігіне ие болды.
Әнші 1994 жылы Ақтөбе қаласында өнерлі отбасында дүниеге келген. Оның әкесі Қанат Айтбаев пен анасы Светлана Айтбаева музыка саласында қызмет еткен. Сол себепті Димаштың шығармашылыққа қызығушылығы бала кезінен оянды.
Ол ерте жастан сахнаға шығып, түрлі музыкалық байқауларда өнер көрсетті. Табиғи дарыны, кең тынысты дауысы және сахнада өзін еркін ұстауы жас кезінен-ақ көрермен назарын аударды.
Димаш Құдайбергеннің басты ерекшеліктерінің бірі – бірнеше октаваны қамтитын кең дауыс диапазоны. Ол классикалық шығармаларды, эстрадалық әндерді және халық туындыларын жоғары деңгейде орындай алады.
Өнер иесі қазақ, орыс, ағылшын, француз, қытай және басқа да тілдерде ән шырқайды. Түрлі жанрдағы шығармаларды еркін орындауы оның әлемнің көптеген елінен жанкүйер жинауына мүмкіндік берді.
Димаштың халықаралық сахнада танылуына «Славян базары» байқауындағы жеңісі үлкен әсер етті. Ол бұл өнер додасында бас жүлдені иеленіп, шетелдік музыка мамандарының назарына ілікті.
Кейін әнші Қытайда өткен "Singer" музыкалық жобасына қатысып, ерекше вокалдық қабілетімен миллиондаған көрерменді таңғалдырды. Осы жобадан кейін оның әлемдік деңгейдегі танымалдығы айтарлықтай артты.
Бүгінде Димаш Құдайберген – Қазақстанның мәдениеті мен музыкалық мұрасын жаһандық аудиторияға танытып жүрген әйгілі өнерпаздардың бірі. Ол өз шығармашылығы арқылы қазақ тілін, ұлттық музыканы және халқымыздың рухани құндылықтарын кеңінен насихаттап келеді.
