Қазақстандық боксшы, әлем және Азия чемпионы Теміртас Жүсіпов әйелін қатыгездікпен соққыға жықты деген айып тағылды, деп хабарлайды Malim.kz.
Жәбірленушінің туыстарының айтуынша, әйел ауыр жарақаттармен ауруханаға жеткізілген. Қазір оқиғаға байланысты полиция тергеу жүргізіп жатыр.
Оқиға туралы алғаш болып жәбірленушінің әпкесі мәлімдеді. Оның сөзінше, әйел ауруханаға ес-түссіз күйде түскен. Дәрігерлер оның басында ашық жарақат, құрысу, асфиксия және ми ісінуі бар екенін анықтаған.
Туыстарының айтуынша, боксшы босатылғаннан кейін де әйеліне қоқан-лоқы көрсетуді жалғастырған. Олар бұл істі «адам өлтіруге оқталу» бабына қайта саралауды талап етіп отыр.
Бұл жағдайға байланысты облыстық полиция департаменті ресми түсініктеме берді. Ведомствоның мәліметінше, 30 маусым күні Көкшетауда отбасылық жанжал кезінде ер адам жұбайына дене жарақатын салған. Аталған факті бойынша сотқа дейінгі тергеу басталды. Тергеу нәтижесінде оқиғаға қатысушылардың әрекетіне құқықтық баға беріледі.
