АҚШ-та тұрып жатқан жазушы Мұхтар Мағауин Президент Қасым-Жомарт Тоқаевқа хат жазды. Қаламгер бұл жазбасында мемлекеттік сыйлықтың іріктеуінен өтпей қалған Тұрысбек Сәукетайға қатысты сөз қозғаған. Мағауин «Мен жындымын», «Бұлағай» атты іргелі туындылар авторының мәреге жетпеуіне өкініш білдірген.
Жазушы өзінің жанашырлық сөзінде:
«...2022 жылғы Мемлекеттік сыйлық талқысы туралы соңғы хабардан естуімше, бүгінгі қазақтың атпал жазушысы, тіпті екінің бірі, үздік қаламгер Тұрысбек Сәукетай ең соңғы іріктен өтпей қалыпты. Абай атындағы марапатқа бірден бір лайықты – осы «Желқайық» романы еді.
Тұрысбек – бүгін ғана жеткен прозашы емес, өткен он жылдықтағы «Ай қараңғысы» және кез келген басқа да романы осы мәртебеге татитын. Бүгінгі бәйгеге «Желқайық» түскен екен. Айтары жоқ, осы жаңа ғасырда дүниеге келген ең озық туындылардың бірі»,- деп жазған.
Сонымен қатар, қаламгер «Мұндай, биік көркемдік деңгейде жазылған, бүгінгі қазақ қоғамының көкейкесті мәселелерін көтерген соқталы романның Мемлекеттік сыйлыққа жетпей қалуы – көңілінде алалық жоқ зиялы қауым үшін, көзі қарақты, ұлт мүддесін ойлайтын оқырман қауым үшін үлкен өкініш болар еді»,- дейді.
Мағауин Тұрысбек Сәукетайды лайықты сыйлығына жеткізуге Президент Тоқаевтан пәрмен күтетінін жазған.
Айта кетейік, Абай атындағы мемлекеттік сыйлық биыл ақын Ғалым Жайлыбай мен жазушы Кәдірбек Сегізбаевқа берілді. Жазушы Сәуле Досжан алғашқы іріктеуден өтпей қалғанда қоғамдық пікір туындап, әжептәуір шу көтерілген еді.
Естеріңізде болса, 2020 жылы қаламгер Тынымбай Нұрмағанбетов мемлекеттік сыйлыққа жетпей құлаған кезде де қоғам белсенділері наразылық білдірген. Соның нәтижесінде айтулы жазушы марапатқа ие болған.
Байланысты жаналықтар
MalimBlocks
