Маңғыстау облысында құтқарушылар далада қалып қойған Ұлыбритания туристеріне көмек көрсетті, деп хабарлайды Malim.kz.
Оқиға Тұзбайыр шатқалы маңында болған. Шетелдік туристер мінген жеңіл көлік сорға батып, өздігінен қозғала алмай қалған.
ТЖМ мәліметінше, оқиға орнына құтқарушылар жедел жіберілген. Көлікте екі ересек адам мен 12 жастағы бала болған. Барлығы – Ұлыбритания азаматтары.
Күрделі табиғи жағдай мен батпақтанған топыраққа байланысты көлікті шығару жұмыстары бір тәуліктен астам уақытқа созылған.
Арнайы техниканың көмегімен құтқарушылар көлікті сордан шығарып, қауіпсіз бағытқа жеткізді.
Оқиға салдарынан зардап шеккендер жоқ. Туристерге медициналық көмек қажет болмаған.
