"МузАрт" тобының әншісі Сәкен Майғазиев кезінде әріптесі Мақсат Базарбаевтың ұжымнан кетуіне қатысты айтылған әңгімелерге жауап берген. Өнер иесі көпшіліктің өзін кінәлағанын айтып, бұл мәселені Мақсаттың өзінен сұраған, деп хабарлайды Malim.kz.
Бұл туралы 2023 жылы "Жақсы адамдарым" бағдарламасында сөз болған. Бағдарламаға "МузАрт" тобының мүшелері, әнші Мақсат Базарбаев және композитор Алтынбек Қоразбаев қатысқан.
Әңгіме барысында Мақсат Базарбаевтың топтан кетуі және оның орнына Кенжебек Жанәбіловтің келуі туралы мәселе қозғалған.
"Мақсатты сен шығарып жібердің деген әңгімелер көп айтылды"
Сәкен Майғазиев әріптесінің ұжымнан кетуіне байланысты әлеуметтік желілерде түрлі пікір тарағанын жасырмады. Әншінің сөзінше, кейбір адамдар Мақсат Базарбаевтың "МузАрттан" кетуіне өзін кінәлі деп есептеген.
"Әлеуметтік желілерде өсек өріп жүреді. Шыны керек, бойым кішкентай болып, ортасында күліп тұрғаннан соң ба, "Мақсатты сен шығарып жібердің" деген әңгімелер көп айтылды. Сол туралы өзің не дейсің?" – деп сұрады Сәкен Майғазиев Мақсат Базарбаевтан.
Өнер иесі бұл сұрақты әзіл араластыра қойған.
Бағдарлама жүргізушілері де Мақсат Базарбаевтың топтан кетуінің нақты себебін білгісі келген. Алайда әңгіме осы тақырыпқа ойысқанда композитор Алтынбек Қоразбаев араласып, мәселені әрі қарай талқыламауға шақырған.
"Күліп отырайық", – деген композитор әңгімені басқа арнаға бұрған.
Бағдарлама барысында Мақсат Базарбаевтың "МузАрт" тобынан неліктен кеткені туралы нақты жауап берілмеген.
Сәкен Майғазиев кім?
Сәкен Қордабайұлы Майғазиев – қазақ эстрадасының танымал әншісі, продюсер, тележүргізуші әрі ұстаз. Ол 1975 жылғы 1 қаңтарда қазіргі Түркістан облысының Созақ ауданында дүниеге келген.
Көпбалалы отбасында тәрбиеленген болашақ әнші бала кезінен өнерге жақын өскен. Музыкаға деген қызығушылығы оны кәсіби білім алуға жетелеп, 1993 жылы Жүсіпбек Елебеков атындағы республикалық эстрада-цирк колледжіне оқуға түскен. Мұнда соқпалы аспаптар және эстрадалық ән орындау бағытында білім алған.
Кейін Темірбек Жүргенов атындағы Қазақ ұлттық өнер академиясында оқуын жалғастырып, вокалдық шеберлігін жетілдірген.
"МузАРТ" тобымен келген танымалдылық
Сәкен Майғазиевтің шығармашылық өміріндегі маңызды кезеңдердің бірі – "МузАРТ" тобына қосылуы. Осы ұжымның құрамында ол қалың көпшілікке кеңінен танылып, қазақ эстрадасындағы белгілі орындаушылардың біріне айналды.
Топтың орындауындағы лирикалық әндер тыңдарман ықыласына бөленіп, "МузАРТ" қазақ музыкасының танымал ұжымдарының қатарына қосылды.
Әнші топпен бірге өнер көрсетумен қатар, жеке шығармашылық жобаларға да қатысып келеді.
Сәкен Майғазиев тележүргізуші ретінде де көрерменге таныс. Ол "Екі жұлдыз" музыкалық жобасына қатысып, кейін жүргізушілік қызмет атқарған. Сондай-ақ "Жаңа күн" ақпараттық-сазды бағдарламасын жүргізген.
Ұстаздық қызметі мен марапаттары
Сәкен Майғазиев сахнадағы шығармашылығымен қатар, жас өнерпаздарды тәрбиелеуге де көңіл бөлген. Ол Жүсіпбек Елебеков атындағы эстрада және цирк колледжінде сабақ беріп, музыкалық білім беру саласында еңбек еткен.
Сонымен бірге түрлі ән байқаулары мен телевизиялық жобаларда қазылар алқасының мүшесі және тәлімгер ретінде қатысқан.
Өнер саласына қосқан үлесі үшін Сәкен Майғазиевке Қазақстанның еңбек сіңірген қайраткері атағы берілген. Сондай-ақ ол "Дарын" мемлекеттік жастар сыйлығының лауреаты атанған.
Бүгінде өнер иесі "МузАРТ" тобымен байланысты шығармашылық жолын жалғастырып, әншілік және қоғамдық қызметімен көпшілікке танылып келеді.
