Ардақ Назаров Әлия Назарбаевамен байланысы туралы қауесетке нүкте қойды

Мәжіліс депутаты Ардақ Назаров «Әлия Назарбаеваның оққағары болған» деген ақпаратты жоққа шығарып, мәселенің анық-қанығын айтты, деп хабарлайды Malim.kz.

«2004 жылы Ресейдің Хабаровск қаласында әлем кубогында төбелестім. Сол кезде орыстардың интернетке жазған пікірін оқып, өзім таңғалдым. «Ол Назарбаевтың қызының оққағары болып жұмыс істейді» депті. Бірақ нақты қай қызы екенін айтпаған, аты аталмаған. Өзім таңғалып қалдым шынымен. Президенттің жанұясының оққағары болу үшін СОП-та (Президенттің күзет қызметі) жұмыс істеуім керек. Оған жұмысқа кіру үшін менің бойым 180 см-ден жоғары болу керек. Менің бойым – 170 см, салмағым 72 кг ол кезде. СОП түгілі, мені десантқа ДШБ-ға алмай қойған ғой», - деді депутат.

Депутаттың айтуынша, оққағар болуға бойының қысқа екенін айтады.

«Әлияның оққағары деген ақылға сыймайды. Бойым да келмейді, денем де келмейді. Ондай мамандығым да жоқ. Бірақ әлі күнге дейін қауесет ретінде айтылып келді. Соның нүктесін қоятын болсақ, түбегейлі жоққа шығарамын. Ол кісіні көрмегем де, білмеймін де. Бірақ президенттің 3 қызы бар екенін, аттары қандай екенін білеміз», - деді Ардақ Назаров.