Қарастырамыз дей сал. Мәжіліс спикерінің министрге айтқан ақылы
Мәжіліс отырыстары қызықты өтетін болып жүр.
![](/images/article-img/1600/18647-1666253424-m.jpg)
Мәжіліс спикері, «Аманат» партиясының төрағасы Ерлан Қошанов өзі басқарып отырған партияның ел алдында ғана емес, билік үшін де сүйкімі қалмағанын уайымдамайтын сияқты. Керісінше, жаңа қырын танытып, Мәжіліс отырыстарын көңілді өткізетін болып жүр.
Ол кеше Мәжіліске келген Мәдениет және спорт министрі Дәурен Абаевқа бір қызық ақыл айтты. Абаевқа мәжіліс депутаты Әлия Әбсеметова туризм, оның ішінде Балқаш көлінің жағдайы туралы айта келіп, Балқаштағы туризмді дамытуға министрліктен қаржы қарастырылған ба, жоқ па, соны сұраған.
Әбсеметова сөзінің соңын: «Сіздің бұл мәселеден хабарыңыз бар болуға тиіс», - деп аяқтаған.
Соңғы кездері жиі «хит» болып жүрген Абаев сасқан жоқ, күле тұра турасын айтты:
«Жоқ. Өкінішке орай бұл мәселеден хабарым жоқ. Енді, негізінде, проблема жоқ, егер...» - деп келе жатқанда спикер Қошанов ортаға килігіп кетті.
«Қарастырамыз деп айтшы», - деп, өзі де күлді, Абаевты да, залды ду күлдірді. - «Жақсы көретін жауабымыз», - деп, тағы қосты. Қошановтың қазақша ақылынан кейін, қазақ тіліне ауысқан Абаев:
«Жоқ, біз дайынбыз ол жұмысты жүргізуге», - деді.
Мәжіліс спикерінің бұл сөзі бүгінгі Мәжілістегі отырыстардың бәрі спектакль деген қауесетті ресми мойындау сияқты әсер қалдырады. Біріншіден, ол ресми жоғары лауазымды тұлға –Қазақстандағы конситуциялық бестікте үшінші тұрған адам, екіншіден, ол бұл сөзді басқа жерде емес, Мәжіліс залында, депутаттың министрге қойған ресми жауабы талқыланып жатқанда айтты. Демек, үкімет мүшелеріне оңашада бұл ақылды жиі айтуы да мүмкін ғой. Сабаққа дайындалмай келген оқушыға айтарға сөз, қоярға баға таппаған мұғалім секілді, «әйтеуір бірдеңе айта салыңдар», деп, айтып үйренген ауыз, Парламент қабырғасында аңдаусыз айтып қойды.
Мұны Қошановтың Абаевты кекетуі деп қарастыруға да болады. Бірақ, Абаев та, Қошанов та бұрынғы «Нұр Отан», қазіргі «Аманат» партиясының мүшесі, демек, оның мүшесі ретінде министр болып отырған адамның атына келген сөз тікелей партияға да кір келтіреді деген сөз. Әлде, президент Тоқаев төрағалығынан бас тартып, президенттікке кандидат ретіндеұсынған қолын алмай кеткен партияның Қошановқа да қызығы қалмады ма екен...
«Қарастырамыз дей сал» дейтін жүрдім-бардым қарым-қатынасқа құрылған төрағалығы партияны қай жерге дейін жеткізерін өзі білер, Парламент Мәжілісіне әсері бола қоймай деп үміттенейік.