IMAGE: ©egemen.kz
Қазақ руханиятына сіңірген басқа еңбегін айтпағанда, ел жадында “Мен - қазақпын!” атты - ұлтымыздың декларациясы сынды ұран-поэмасымен мәңгіге қалған Жұбан Молдағалиевтің туғанына - 105 жыл.
Саналы ғұмыры қазақтың еңсесін көтеру кезеңіне тап келген ақынның қазақты дәріптейтін өлең жолдарын білмейтін адам кем де кем. “Мен - қазақпын!” поэмасының үзінділері әлдеқашан рух көтерер ұранға айналды. Мұндай жырды Кеңес Одағы кезінде жарық көргенін (1964 жылы) ақынның ерлігіне баламасқа болмайды.
Биыл ақынның мерейтойын туған жері - Ақжайық ауданы ерекше атап өтті. Мерейтойдың басты жаңалығы - «Жұбан Молдағалиев. Естеліктер. Тарихи-ғұмырдеректік анықтамалық» кітабы болды. Кітапты құрастырушы жергілікті жазушы Бақтығали Қоспаев екен. Бұл еңбектің ерекшелігі бар. Ол алғаш рет Жұбан Молдағалиевтің 100 жылдың мерейтойында паш етілген. Енді, бұл жолы - кейін белгілі болған жаңа деректермен, замандастарының естеліктерімен де қосылып отыр. Оған қоса, ақынның туған жері туралы да мағлұматтар енген.
