Ресей Сирияның солтүстік-шығысындағы Эль-Камышлы аэродромынан әскери күштерін шығарып, елдің осы өңіріндегі қатысуын қысқартып жатыр. Бұл туралы Reuters агенттігі сириялық бес дереккөзге сілтеме жасап хабарлады. Аталған аймақта Дамасктегі үкімет күрд күштерінен бақылауды қайта алуға ұмтылып отыр, деп хабарлайды Malim.kz.
Ресей әскери бөлімшелері әл-Қамышлы әуежайында 2019 жылдан бері орналасқан. Бұл контингент Ресейдің Хмеймим әуе базасы мен Сирияның Жерорта теңізі жағалауындағы ӘТК-нің материалдық-техникалық қамтамасыз ету пунктімен салыстырғанда әлдеқайда шағын болған. Мәскеу аталған негізгі нысандарды сақтап қалады деп күтілуде.
Сирия президенті Ахмед аш-Шарааға бағынатын күштер қаңтар айында елдің солтүстігі мен шығысындағы, бұған дейін күрдтердің Сириялық демократиялық күштерінің бақылауында болған ауқымды аумақтарды өз қарамағына алды. Дамаск бүкіл Сирия аумағында билігін қалпына келтіруге ниетті.
Reuters дереккөздерінің екеуінің айтуынша, Ресей әскері әл-Қамышлы әуежайынан кезең-кезеңімен шығуды өткен аптада бастаған. Бөлімшелердің бір бөлігі Сирияның батысындағы Хмеймим әуе базасына ауыстырылуы мүмкін, ал қалғандары Ресейге қайтарылады.
Сирия қауіпсіздік құрылымдарындағы тағы бір дереккөз соңғы екі күнде Ресейдің әскери техникасы мен ауыр қару-жарағы әл-Қамышлыдан Хмеймим әскери аэродромына жеткізілгенін мәлімдеді.
Өткен аптада «Коммерсант» газеті аты-жөні аталмаған сириялық дереккөзге сілтеме жасап, күрд жасақтары ығыстырылғаннан кейін Сирия үкіметі Ресейден Эль-Камышлы базасын босатуды сұрауы мүмкін екенін жазған. Себебі «ол жерде енді оларға істейтін жұмыс қалмаған».
Дүйсенбі күні Reuters тілшісі әл-Қамышлы аэродромының үстінде Ресей жалаулары әлі де желбіреп тұрғанын, ал ұшу-қону жолағында Ресейдің таным белгілері бар екі ұшақ тұрғанын байқаған.
Бұрын Сирияның тақтан тайдырылған президенті Башар Асадтың жақын одақтасы болған Ресей, билікке 14 ай бұрын келген Ахмед аш-Шараа бастаған исламшыл коалициямен жұмыс қарым-қатынасын орнатты. Өткен жылы аш-Шараа Ресей президенті Владимир Путинге Дамаск Мәскеумен бұрын жасалған барлық келісімдерді сақтайтынын мәлімдеген. Бұл Ресейдің Сириядағы негізгі әскери нысандарының сақталатынын білдіреді.
Еске салсақ, бұған дейін Сирия халқы Башар Асад режимінің құлатылғанын тойлап еді.
