Президент Қасым-Жомарт Тоқаев Қазақстанға мемлекеттік сапармен келген Бельгия королі Филипп пен патшайым Матильданы Астана әуежайында қарсы алды, деп хабарлайды Malim.kz.
Корольдік жұп мінген ұшақ Қазақстан шекарасынан елордаға дейін Қазақстан Әскери-әуе күштерінің ұшақтарымен қапталдаса ұшты. Әуежайда мәртебелі меймандарды қарсы алу үшін Құрмет қарауылы ротасы мен Президенттік оркестр сап түзеді.
Әуежайда Қасым-Жомарт Тоқаев Бельгия королі Филипп және патшайым Матильдамен қысқаша әңгімелесті.
Мемлекет басшысы бұл сапардың Қазақстан мен Бельгия арасындағы қарым-қатынасты одан әрі дамыту үшін маңызды екенін атап өтті.
"Қазақстанға қош келдіңіздер. Сапарларыңыз мемлекетіміздің дамуындағы өте маңызды кезеңмен тұспа-тұс келіп отыр. Жалпы, еліміз өркендеп, экономикасы ілгерілеп келеді. Сіздердің сапарларыңыз екіжақты қарым-қатынасқа тың серпін береді деп айтуға болады", – деді Қасым-Жомарт Тоқаев.
Өз кезегінде король Филипп көрсетілген қонақжайлық үшін Қазақстан Президентіне алғыс айтып, алдағы келіссөздердің нәтижелі болатынына сенім білдірді.
"Ұшақ трапынан қазақ жеріне қадам басқан сәттен бастап көрсетілген сый-құрмет үшін Сізге алғыс айтамын. Үш күндік сапармен келгенімізге қуаныштымыз әрі еліңізбен жақынырақ танысамыз деп сенемін", – деді ол.
Бұған дейін Ақорда 11-14 қазан аралығында Бельгия королі мен патшайымының Қазақстанға мемлекеттік сапар жасайтынын хабарлаған. Бағдарлама аясында Қазақстан-Бельгия іскерлік кеңесінің IV отырысы, екі ел жоғары оқу орындары ректорларының форумы және бірқатар басқа іс-шара өтеді. Сапар қорытындысында Бірлескен мәлімдеме қабылданып, бірқатар екіжақты құжатқа қол қою жоспарланған.
