Әлеуметтік желіге арналған қойылымға қатысып жүрмін деп ойлаған әйел өзінің заңды некеге тұрғанын екі айдан кейін білген. Шындық ер адам одан көші-қон құжаттарына өзін жұбайы ретінде қосуды сұрағанда ашылған, деп Malim.kz тілшісі People басылымына сілтеме жасап хабарлайды.
Оқиға туралы ақпарат 2025 жылғы қаңтарда жарияланған. Әйел сотта неке рәсімін Instagram үшін түсіріліп жатқан әзіл деп қабылдағанын түсіндірген. Оның айтуынша, ер адам осы видео арқылы парақшасының танымалдығын арттырғысы келетінін айтқан.
Екеуі 2023 жылғы қыркүйекте танысу қосымшасы арқылы танысқан. Желтоқсанда ер адам оны ақ киіммен келетін кешке шақырған. Алайда барған жерінде әйел өзін неке рәсімі күтіп тұрғанын көрген. Сотқа берген түсініктемесінде ол сол күні шын тұрмысқа шығамын деп ойламағанын жеткізген.
Шындық ашылғаннан кейін әйел некені жарамсыз деп тануды сұраған. Ер адам оның айтқандарымен келіспей, рәсімнің шынайы болғанын мәлімдеген. Оның нұсқасы бойынша, екеуі кейін үлкен той өткізуді жоспарлаған.
Алайда сот әйелдің сол күні заңды некеге саналы түрде келісім бермегені туралы қорытындыға келген. Судья оның өзін қалыңдықтың рөлін ойнап жүрген адам ретінде қабылдағанын ескеріп, некені жарамсыз деп таныған. Тараптардың аты-жөні құқықтық себептерге байланысты жарияланбаған.
