Алматы тұрғыны, блогер Айтолқын Айханова есімін ресми түрде өзгертіп, жаңа туу туралы куәлігін алды. Ол бұл жаңалығын әлеуметтік желідегі парақшасында бөлісті, деп хабарлайды Malim.kz Azattyq Rýhy сайтына сілтеме жасап.
Оның айтуынша, ұзақ жылдар бойы қолданып келген Айтолқын есімінен бас тартып, сәби кезінде берілген алғашқы есімін қайтаруға шешім қабылдаған.
Мені танитын адамдар туғанда қойылған алғашқы есімімді біледі. Қырық күнге дейін солай атап келген, кейін есімімді өзгерткен. Бұл атты маған атам қойған еді. Өмірімде жаңа кезең басталып жатқандықтан, алғашқы есімімді қайтаруды жөн көрдім. Енді мені Барселона деп атаңыздар, – деді ол.
Блогердің сөзінше, ерекше есімнің қойылуына атасының дәстүрі себеп болған. Ол дүниежүзіндегі ірі спорттық жарыстар өткен қалалардың атауын немерелеріне есім ретінде беріп отырған.
Барселонаның айтуынша, ол 1992 жылғы Олимпиада ойындары өткен Барселона қаласының құрметіне аталған. Отбасындағы өзге туыстарының есімдері де ерекше. Мәселен, ағасының есімі – Сеул, інісінікі – Сидней, ал жиен қарындасына Токио есімі берілген.
