Кинодағы махаббатты шынайы сомдаған актерлерді көрермен кейде өмірде де жұп деп ойлап қалады. Олардың арасында бұл болжамға түсініктеме беріп, тек әріптес екенін айтқандар да бар. Malim.kz экрандағы жарасымымен жұртты сендірген бес актерлік жұпты ұсынады.
Дариға Бадықова мен Рүстем Жаныаманов: Айсара мен Қылышбектің жарасымы
"Келінжан" телехикаясындағы Айсара мен Қылышбек көрерменге өз ауылындағы таныс отбасы секілді болып кетті. Дариға Бадықова үлкен келін Айсараны, Рүстем Жаныаманов оның күйеуі Қылышбекті сомдайды. Олардың отбасылық тіршілігі әзілмен өрілгенімен, кейіпкерлердің қарым-қатынасынан күнделікті өмірде кездесетін мінездер мен жағдайларды байқауға болады.
Айсара – ойын бүгіп қалмайтын, сөзге де, іске де ширақ келін. Қылышбек көбіне әйелінің көңіліне қарап, оның мінезіне ыңғайланады. Бірақ ол үнемі айтқанға көне беретін кейіпкер де емес. Осы айырмашылық олардың сөз қағыстыруын қызықты етіп, экрандағы қарым-қатынасына жан бітірген.
Көрерменнің екеуін өмірде де бірге деп ойлағанын Дариғаның өзі растаған. Актриса 2022 жылғы әлеуметтік желідегі жазбасында экрандағы жұптың шынайы өмірде ерлі-зайыпты емес екенін қабылдай алмайтындар кездесетінін айтқан.
"Біз өмірде жұп емеспіз” десек ренжитіндер бар әуелі", – деп жазған ол.
Бадықова мұны актерлердің бір-бірін түсініп ойнауымен байланыстырған. Оның түсіндіруінше, әріптестер арасындағы шығармашылық үйлесімді көрермен сезеді, содан экрандағы жақындықты өмірге де ауыстырады. Алайда актриса Рүстем екеуінің арасын достық пен жанашырлық байланыстыратынын нақтылаған.
Айсара мен Қылышбектің танымалдығы телехикаямен шектелмеген. 2021 жылы актерлер “Махаббаттың мейрамы” атты дуэт ұсынған. Дариға әннің көрермендер мен осы кейіпкерлердің жанкүйерлерінің сұрауымен жазылғанын хабарлаған. Бұл да экрандағы жұптың халыққа қаншалықты жақын болғанын аңғартады.
Бақыт Әліпбаева мен Қуандық Шәкіржанов: жұрт тойға да бірге шақырған тандем
Бақыт Әліпбаева мен Қуандық Шәкіржановтың шығармашылық байланысы ұзақ жылға созылған. Олар – Тұңғышбай Жаманқұловтың шеберханасында бірге оқыған курстастар. Көрермен екеуін "Бауыржан шоу" театрындағы өнері арқылы да жақсы таниды. Qazaqstan телеарнасының материалында олардың сахнадағы "құда-құдағи" бейнелерімен танылғаны айтылады. Сондықтан барлық ортақ қойылымда оларды ерлі-зайыпты болып ойнады деу дұрыс емес.
Ал Бақыт Әліпбаеваның өз сұхбатына сүйенсек, олардың тандемінің қалыптасуына "Көк Москвич" интермедиясы ықпал еткен. Кейін "Дударай" бағдарламасында және "Жаңа қоныс" телехикаясында ерлі-зайыптының рөлін сомдаған. Бірге жиі көрінуі мен отбасылық образдарының көрермен жадында орнығуы екеуінің жеке өміріне қатысты қате түсінік туғызған.
"Жаңа қоныс" телехикаясы ауылдан қалаға көшкен отбасының тіршілігін баяндайды. Кейіпкерлер қалада өмірін жалғастырып, өз баспанасына қол жеткізуді армандайды. Бақыт пен Қуандық осы отбасылық оқиғаның басты рөлдерін сомдаған. Мұнда олардың жұп ретіндегі бейнесі романтикалық кездесулер арқылы емес, ортақ тұрмыс пен күнделікті мәселелер аясында ашылады.
Көрерменнің шығармашылық серіктестікті шынайы некемен шатастырғанын актриса жасырмаған.
"Жұрттың көбі Қуандықты менің күйеуім деп ойлайды екен", – деген Бақыт Әліпбаева.
Актрисаның айтуынша, оларды тойларға да ерлі-зайыпты ретінде шақыратындар болған. Дегенмен өнердегі серіктестердің әрқайсысының өз отбасы бар. Әліпбаева сол сұхбатында жұбайының бұл тандемге түсіністікпен қарайтынын, Қуандықтың отбасымен де жақсы араласатынын айтқан. Осылайша көпшілік бірге елестететін екі әртісті өмірде шығармашылық әріптестік пен ұзақ жылғы таныстық байланыстырады.
Назар Шархан мен Нұргүл Мыңғатова: Мәдібек пен Балқия жұбы
"Келінжандағы" Мәдібек пен Балқия да көрермен өмірде бірге деп ойлаған жұптардың қатарында. Назар Шархан Күлімхан апаның ортаншы ұлы Мәдібекті, Нұргүл Мыңғатова оның жары Балқияны сомдайды. Бұл отбасының экрандағы өмірінде әзіл, қызғаныш, күдік пен татуласу қатар жүреді.
Мәдібек – қылжақбас, кейде аңғалдық танытатын кейіпкер. Балқия енесі мен абысынының арасында өз орнын сақтауға, отбасының берекесін кетірмеуге тырысады.
Алайда экрандағы еркіндік бірден пайда болмаған. Назар Шархан Aikyn.kz-ке берген сұхбатында Нұргүлмен алғашқы ортақ сахнаны түсірген кезде қысылғанын айтқан. Ол кезде Мәдібек көліктің капотын ашып, жөндеп тұрады, ал Балқия келіп, оны арқасынан ұрады. Актер өзін еркін сезіне алмай, көрініс бірден сәтті шықпаған. Кейін біртіндеп рөлге үйренген.
Шархан кейіпкерді қалыптастыруда ауылдағы таныс адамдардың қылықтарын еске түсіріп, пайдаланғанын да жеткізген. Мәдібектің кейбір әдеттері осылай пайда болған. Режиссердің импровизацияға мүмкіндік беруі актерлерге өз кейіпкерлерінің сөзін, мінезін толықтыра түсуге жол ашқан.
Осы еңбектің нәтижесінде көрермен Мәдібек пен Балқияның отбасына сенген. Бұл туралы Назар Шархан “Ұйқым келмейді” бағдарламасында тікелей айтқан.
"Шын мәнінде, Нұргүлдің өз отбасы, менің өз жанұям бар", – деп түсіндірген актер.
Бағдарламаға Назардың жұбайы Ақбөпе де қатысқан. Ол күйеуін экрандағы серіктесінен қызғанбайтынын, Нұргүлдің отбасымен араласатынын айтқан. Демек, телехикаядағы ерлі-зайыптылардың өмірде де бірге болуы туралы болжамды актердің өзі жоққа шығарған.
Жандос Айбасов пен Динара Бақтыбаева – "Он и Она" фильміндегі ғашықтар
Жандос Айбасов пен Динара Бақтыбаева 2013 жылы жарыққа шыққан режиссер Сәкен Жолдастың "Он и Она" романтикалық фильмінде басты рөлдерді сомдады. Оқиға Алматыда тұратын қарапайым студент пен оның өмірін өзгерткен батыл, тосын әрекеттерге бейім қыздың таныстығынан басталады. Қыз жігіттің күнделікті тіршілігіне жаңа әсер әкеледі. Кейін ол жұмбақ нұсқаулар жазылған хаттар қалдырып, жігіттің өмірінен жоғалады.
Экранда ғашықтарды сомдаған актерлер түсірілімге дейін бір-бірімен жақын араласпаған. Динараның айтуынша, кастинг пен сынақтарда олардың әңгімесі амандасу және қоштасумен шектелген. Сондықтан ортақ көріністерге дайындық кезінде бір-біріне үйреніп, еркін қарым-қатынас орнатуға тура келген. Бұл жұмыста оларға актриса әрі педагог Ольга Ландина көмектескен.
Динара кейіпкердің сезімін жеткізу үшін өзінің басынан өткен жағдайларды еске түсіргенін айтқан. Мәселен, хат оқып, жылайтын көріністе жасанды жасқа арналған тамшының көмегі қажет болмаған: актриса өміріндегі ұқсас сәтті ойлап, өзі жылаған. Осындай дайындық олардың экрандағы жақындығын нанымды көрсетуге бағытталған.
Фильмдегі махаббаттан кейін актерлердің жеке қарым-қатынасына да қызығушылық туған. Comode.kz 2015 жылғы материалында Жандос пен Динараға ұзақ уақыт роман телінгенін, алайда бұл болжамның расталмағанын жазған. Динара да 2013 жылы "Время" газетіне берген сұхбатында түсірілім кезінде екеуінің де басқа адаммен қарым-қатынаста болғанын, өзара достық қана байланыстырғанын түсіндірген.
Әсел Сағатова мен Алексей Чадов – "Махаббат тәлкегіндегі" Әсел мен Иван
Әсел Сағатова мен ресейлік актер Алексей Чадов Қазақстан мен Ресей бірлесіп түсірген "Махаббат тәлкегі" – "Ирония любви" романтикалық комедиясында экрандық жұп болды. 2010 жылы көрерменге ұсынылған туындыда Сағатова Әсел есімді бойжеткенді, Чадов Иванды сомдайды.
Фильмдегі сезім әуелде бәс тігуден басталады. Әсел құрбыларымен алғашқы кездескен жігітті өзіне ғашық ететініне бәстеседі. Бірақ оның алдынан анасының айтқанынан шықпайтын Иван кезігеді. Жігіттің жүрегін жаулауды жеңіл көрген бойжеткен кейін өзі де оған ғашық болып қалғанын аңғармайды.
Актерлерге мінезі мен өмір салты бөлек екі адамның жақындасуын көрсету міндеті жүктелген. Әселдің бастамашылдығы мен Иванның жасқаншақтығы олардың қарым-қатынасындағы комедиялық жағдайларға негіз болады. Оқиға өрбіген сайын бастапқы ойын шынайы сезімге айналады.
КТК телеарнасының фильм тұсаукесері туралы репортажында Чадов әріптесінің сұлулығы мен талантын жоғары бағалаған. Алайда шығармашылық әріптестік туралы жылы пікірді олардың өмірдегі махаббатына дәлел ретінде қабылдауға болмайды.
Соған қарамастан екеуіне роман телінген. "Караван" басылымы 2010 жылғы 18 маусымдағы материалында Әсел мен Алексейдің кездесіп жүргені туралы әңгіме болғанын жазған. Сол мақалада Сағатованың актер екеуінің арасында тек достық бар екенін айтқаны да көрсетілген. Демек, олардың экрандағы махаббаты жеке өміріне қатысты болжамға ұласқанымен, расталған қарым-қатынас ретінде берілмеуі керек.
Жанар Дұғалова мен Тәуекел Мүсілім – экрандағы махаббаттан туған болжам
Жанар Дұғалова мен Тәуекел Мүсілімнің шығармашылық жұбы "Махаббатым жүрегімде" телехикаясынан таныс. ҚазАқпараттың мәліметінше, екеуі бұл туындыда ерлі-зайыптылардың рөлін сомдаған. Кейін экрандағы серіктестік Жанардың "Ала кетпедің" бейнебаянында жалғасты. 2017 жылы жарық көрген клипте олар бір-біріне ғашық жандарды бейнеледі. Әннің сөзі мен музыкасын Жанардың өзі жазған.
Қос өнерпаздың сезімге толы көріністері жұрт назарын аударған. "Ала кетпедің" бейнебаянындағы жақындық пен кейін бірге тараған фото-видеолар олардың жеке өміріне қатысты әңгімелерге ұласқан. Әсіресе шетелде бірге жүрген кадрлардан кейін көпшілік екеуін өмірде де жұп деп қабылдай бастаған. Жанарға Тәуекелмен кездесіп жүрген-жүрмегенін, оған тұрмысқа шығатынын сұраған хабарламалар келген.
Алайда бұл болжамның тарауына экрандағы жарасым ғана себеп болмаған. 2018 жылы "Ревю" бағдарламасында Тәуекел бірге жүргендері туралы әңгіменің сусабын жарнамасына арналған науқанмен байланысты екенін түсіндірген. Актер жұрттың қызығушылығын ояту үшін кездесіп жүргендері туралы қауесетті өздері де таратқанын айтқан. Сондықтан олардың "махаббат хикаясын" шынайы қарым-қатынас ретінде көрсету дұрыс емес.
Шығармашылық байланыс бұдан кейін де үзілмеген. Жанар "Сүйем – жек көрем" бейнебаянына да Тәуекелді шақырған. Әнші бұл жұмысты "Ала кетпедің" клипінің жалғасы ретінде қарастыруға болатынын айтып, әріптесінің өзін дос ретінде қолдағанын жеткізген. Осылайша көрермен бірге елестеткен жұпты ортақ жобалар мен достық байланыстырған.
Экрандағы отбасының көрерменге таныс адамдардай жақын болуы – актер еңбегінің бір нәтижесі. Дегенмен кейіпкердің тағдыры мен оны сомдаған адамның жеке өмірі бөлек. Бұл үш шығармашылық жұп та көрерменнің сеніміне ие болғанымен, өзара қарым-қатынасының әріптестік екенін ашық түсіндірген.
