Биньямин Нетаньяху палестиналық мемлекетке қатысты түбегейлі қарсылығын қайта растады, деп хабарлайды Malim.kz. DW-ге сілтеме жасап.
Оның айтуынша, бұл мәселе бойынша ұстанымы өзгермеген. Ол бұл туралы ультраоңшыл министрлердің нақты позиция білдіру туралы талабына жауап бере отырып айтты.
Израиль премьер-министрі Биньямин Нетаньяху 16 қараша, жексенбі күні өткен үкімет отырысында Палестина мемлекетінің құрылуына қарсы екенін тағы мәлімдеді. Ол палестиналық мемлекеттің кез келген аумақта құрылуына қарсылығы бұрынғыдай сақталғанын атап өтті. “Маған ешкімнің қолдауы, твиттері немесе дәрісі қажет емес”, — деп келтіреді оның сөзін Reuters агенттігі.
Бұған дейін ультраоңшыл партиялар өкілдері Бецалель Смотрич пен Итамар Бен-Гвир премьер-министрден АҚШ президенті Дональд Трамптың Таяу Шығыс бойынша бейбіт жоспарын қолдайтын БҰҰ Қауіпсіздік кеңесінің жобасында “палестиналық мемлекетке жол” деген тұжырым пайда болғаннан кейін, палестиналық мемлекеттілікті түбегейлі жоққа шығаруды талап еткен. Бен-Гвир тіпті Нетаньяху шара қолданбаса, үкіметтік коалициядан шығатынын ескерткен.
Биньямин Нетаньяху Трамптың жоспарына қыркүйек айында Ақ үйге сапары кезінде келісім берген болатын. Сол уақыттан бері Палестина мемлекетінің құрылу мүмкіндігі туралы ашық мәлімдеме жасамаған еді.
