Байзақ ауданындағы әскери бөлім қоймасында жарылыс салдарынан болған өртті сөндіру кезінде төрт әскери қызметші қаза тапты. Бұл туралы бүгін өткен онлайн брифингіде қорғаныс министрі Нұрлан Ермекбаев мәлімдеді.
"Қаза тапқандар арасында тұрғындар жоқ. Полковник, әскери прокурор Қапезов, сержант Мішенбаев, ефрейтор Жанболатов және әскери күзет қызметкері Дәлібаев мерт болды. Қаза тапқан әскер қызметшілердің туыстарына көңіл айтамыз", - деді Ермекбаев.
Министр қазіргі кезде жарылыстар тоқтағанын мәлімдеді. Оның айтуынша, қоймада оқ-дәрі көп болмаған, олардың ұшу радиусы 3 км.
"Оқиға себептері анықталып жатыр. Біз қауіпсіздік ережелерінің сақталмауы, химиялық реакция, өздігінен өртену немесе қасақана өртеу тәрізді себептерді жоққа шығармаймыз", - деді қорғаныс министрі.
Жамбыл облысының әкімі Бердібек Сапарбаевтың айтуынша, Тараз қалалық ауруханасында 28 адам ем алып жатыр. Олардың алтауының жағдайы орташа ауыр, бірақ өміріне қауіп жоқ. Байзақ ауданының ауруханасында дәрігерлік көмек алған жеңіл жарақат алған 60 адам үйіне қайтарылды.
Байланысты жаналықтар
MalimBlocks
