Дүниежүзілік көшпенділер ойындары аясында көкпардан өткен Қазақстан мен Қырғызстан кездесуі даумен аяқталды, деп хабарлайды Malim.kz.
Көкпардан Қазақстан мен Қырғызстан финалда кездесті. Астанадағы «Қазанат» атшабарындағы кездесуде Қазақстан қосымша уақытта 5:4 есебімен жеңіске жетті. Ал қырғыз спортшылары мен жанкүйерлері әділетсіздік болды деп бұл жеңіспен келіспейді.
Қырғызстан көкпар құрамасының басшысы Ерлан Әбдіғаппаров пікір білдірді.
Әділетсіз болатынын білгенбіз. Бірақ мұншалықты деңгейде қазақтың тақымына бастырып, ысқырып, қазақтың көкпаршыларына 4 салым салдырып, осындай әділетсіздік болады деп ойлаған емеспіз, - дейді Қырғызстан спортшысы.
Ол Қазақстанның күн құрылымдары тарапынан қысым көргенін айтады.
Біз 3:1 есебімен ұтып жатқанда жеке аттар шыққанда біздің бала артқа қараған кезде құлаққа бастырып, ысқырық беріп, төрт жолы салым салдырды, – дейді ол.
Ал Қырғызстан құрамасының марапаттау рәсімі бітпей жатып, мойындарындағы алқаны шешіп, кетіп қалды. Болған жайтқа қатысты көкпардан ұлттық құраманың бас бапкері Ақылбай Манкеев пікір білдірді.
Енді бұл спорттық этикаға келмейді. Бұны эмоцияға жабуға болмайды, өйткені спортта бірде – ұтасың, бірде – ұтыласың, - дейді көкпардан ұлттық құраманың бас бапкері Ақылбай Манкеев.
Сондай-ақ Мәжіліс депутаты, танымал журналист, Мақсат Толықбай тартысты көкпар туралы пікір білдірді.
Өсекті қою керек. Қырғыз ағайындар “ойыншымызды қамшымен тартып жіберді” деп дау шығарып жатыр екен. Бас жарылып, көз шыққан жоқ қой. Қазақ ойыншысы айып алаңына қуылып, жазасын алды емес пе? Көкпар жүректі, білектілердің ойыны. Шаңның ішінде аттың жығылып, көкпаршылардың тапталып қалғанын талай көрдік. Отқа май құйып, түймедейді түйедей етудің қажеті жоқ. Көкпаршы тұрмақ, жанкүйермен бірге қамшының астында қалған кезді ұмытқан жоқпыз. Арыға бармай-ақ қояйық… Расында мынадай сойқан көкпарды бұрын-соңды көрмеппін. Біздің жігіттер таза жеңді. Құтты болсын! Қазақстан!”,- деді журналист
Фото: видеодан кадр
Байланысты жаналықтар
MalimBlocks
