Ақтөбе облысында қауіпті той кортежіне қатысқандар жауапқа тартылды. Бұл туралы Massaget.kz сайтына сілтеме жасап Malim.kz хабарлайды.
Әлеуметтік желілерге жүргізілген мониторинг кезінде полиция қызметкерлері той кортежі жол қозғалысы ережелерін өрескел бұзғанын анықтаған.
Көлік қозғалысы кезінде жолаушылар терезеден денесін шығарған, жүргізушілер телефон пайдаланған және қауіпсіздік белдігін тақпаған.
"Мұндай әрекеттер жол қозғалысына қатысушылардың өмірі мен денсаулығына қауіп төндіреді. Видеоны зерделеу барысында Мұғалжар аудандық полиция бөлімінің қызметкерлері кортежге қатысқан көлік жүргізушілері мен жолаушыларды анықтады", - деп жазылған хабарламада.
Олардың барлығы қолданыстағы заңнамаға сәйкес әкімшілік жауапкершілікке тартылған. Көліктердің бірі арнайы тұраққа қойылды.
