"270 әскери қызметкер қаза тапқан". Депутат әскердегі әлімжеттікті айыптады
Ол сарбаздардың ісі әділ тергелуі керек екенін айтты
Мәжіліс депутаты Нартай Сәрсенғалиев Қорғаныс министрі Руслан Жақсылықовтың атына жолдаған депутаттық сауалында әскерде жүріп мерт болған, ауыр жарақаттанған сарбаздардың ісі әділ тергелуі керек екенін айтты.
Депутаттың сөзінше, кейінгі 3 жылда елімізде 270 әскери қызметкер қайтыс болған. Ал кейінгі төрт жылда әскерде 86 суицид тіркелген, 20 әскери адам өз-өзіне қол салуға оқталған. Бұл – әскери прокуратура мәлімдеген ресми дерек.
"2023 жылғы тамызда әскери бөлімшелердің бірінде командир әскерге жаңадан келген сарбазды орындықпен ұрып, соққыға жыққан. 2024 жылғы маусым айында Жамбыл облысының бір әскери бөлімшесінде әскерге келгеніне бір ай болған сарбаз ес-түссіз жансақтау бөліміне түскен. Ал таяуда болған жағдай бүкіл отандасымыздың ашу-ызасын туғызды. Ұлттық ұланның жауынгері Ербаян Мұхтар басынан алған жарасынан бес ай бойы ес-түссіз жатты. Жауаптылар "Ербаян дәретханаға құлап, жарақаттанды" дейді. Бұған кім сенеді? Жарақаттың салдарынан сарбаздың басының жартысын алып тастауға тура келген. Енді оған тұрақты күтім қажет. 7 қыркүйек күні Ақтаудағы гарнизонда сарбаз Марат Барқұлов есімді бауырымыз көз жұмды. Оны офицер атып жіберген. Бұл қасақана жасалған әрекет пе, жоқ па? Аталған сұрақтың жауабын тергеу орындары әділ зерттеп, нәтижесін қоғамға ашық түрде жеткізуі керек", – деді Нартай Сәрсенғалиев мәжілістің жалпы отырысында.
Фото: Мәжілістің баспасөз қызметі
