Қостанайлық полицейлер «Иегова куәгерлерімен» соттасып жүр

Қостанай облысының полицейлерінің ісін БҰҰ-ның Адам құқықтары жөніндегі комитеті қарайтын болды. HALYQSTAN телеграм-арнасының жазуынша, олар себебі «Иегова куәгерлері» қауымының құлшылық ету рәсімін 25 минутқа тоқтатқан, деп хабарлайды Malim.kz.

Оқиға 2023 жылдың 1 қаңтарында болған. Қостанай қаласының «Христиан қауымы Иегова куәгерлері» деп аталатын тобының 12 мүшесі Қарабалық ауылындағы «Бершат» сауда орталығында жиналып, мерекелік кездесу мен құлшылық рәсімін өткізген. Алайда бұл жиналыс кейбір келушілерге ұнамай, «күдікті тұлғалар» жиналғаны туралы полицияға хабарлаған.

Оқиға орнына келген тәртіп сақшылары Иегова куәгерлерінің құжаттарын тексеріп, адамдардан олардың жиналыс себебін сұрастырып, 25 минут ішінде тексеруді аяқтаған. Ешкімді ұстамастан, полицейлер оқиға орнынан кеткен.

Қауым мүшесі Эдуард Малыхин полицияның әрекеті құлшылық ету құқығын бұзып, жеке мәліметтерін қорғау құқығын шектеді деп санап, сотқа жүгінеді. Ол полиция әрекеттерін заңсыз деп тануды және полицейлер тіркеген қауым мүшелерінің жеке деректерін барлық деректер базасынан жоюды талап етеді.

2023 жылдың шілдесінде Қостанай облысының ауданаралық әкімшілік соты қауым мүшелерінің талаптарын қанағаттандырудан бас тартқан. Иегова куәгерлері берілмей, бір жыл бойы сот шешімін апелляциялық және кассациялық тәртіпте шағымдануға тырысұанымен, нәтижесіз болды.

Тексеру жүргізу кезінде полиция қызметкерлері өкілеттіктер мен қолданыстағы заңнаманың талаптары шегінде әрекет етті, деп түсіндірген Жоғарғы Соттың сот алқасы өз қаулысында.

Соттардан еш нәтиже шықпаған соң, Иегова куәгерлерінің христиан қауымы жақында БҰҰ Адам құқықтары жөніндегі комитетіне алты шағым жолдаған. Оның нәтижесі қандай болары және Қазақстанның құқық қорғау органдарына әсер етер-етпесі белгісіз.

Айта кетейік, Иегова куәгерлерінің қызметі Қытай, Ресей және әлемнің көптеген елінде тыйым салынған.

Фото: kstnews.kz