Танымал әнші Заттыбек Көпбосынұлы әзілкеш Тұрсынбек Қабатовтың туған күніне орай әлеуметтік желіде құттықтау жариялады, деп хабарлайды Malim.kz.
Өнер иесі Instagram парақшасында әріптесіне жылы лебізін білдіріп, ұзақ ғұмыр тіледі.
"Туған күніңмен! Алла ұзақ жас берсін", – деп жазды Заттыбек Көпбосынұлы.
Әншінің бұл жазбасына желі қолданушылары да үн қосып, Тұрсынбек Қабатовқа ақ тілектерін жолдаған.
Еске сала кетейік, Тұрсынбек Қабатов әлеуметтік желідегі парақшасында жаңа бағдарламамен гастрольдік сапарға шығатынын мәлімдеген еді.
Тұрсынбек Қабатов кім?
Тұрсынбек Аманғалиұлы Қабатов – қазақстандық әзілкеш, актер, КВН ойыншысы және сатира жанрында танылған өнер иесі. Ол 1979 жылғы 10 қазанда Батыс Қазақстан облысы Казталов ауданының Ақпәтер ауылында дүниеге келген.
Тұрсынбек Қабатов көпшілікке күнделікті өмірдегі қарапайым жағдайларды, қоғамдағы құбылыстар мен қазақы мінезді әзіл арқылы жеткізуімен танылды. Оның сахнадағы басты ерекшелігінің бірі – көрерменге жақын тақырыптарды өзіндік мәнермен баяндауы.
Өнер жолын 2000 жылы Ғарифолла Құрманғалиев атындағы Батыс Қазақстан облыстық филармониясында бастаған. Кейін Көңілді тапқырлар клубында өнер көрсетіп, әзіл әлеміне кеңінен таныла түсті.
Студенттік жылдары "Аграрка сарбаздары", "Астана.kz" және "Казахи" командаларының құрамында ойнаған. Әсіресе «Казахи» командасындағы өнері Тұрсынбек Қабатовтың Қазақстаннан тыс аудиторияға да танылуына ықпал етті.
2010 жылы командасымен бірге Халықаралық КВН одағы Жоғарғы лигасының вице-чемпионы атанды. Осы кезеңнен кейін ол отандық әзіл-сықақ сахнасындағы танымал тұлғалардың біріне айналды.
Кейін Тұрсынбек Қабатов жеке шығармашылығына басымдық беріп, Астана мен Алматыда концерттер өткізіп, телевизиялық және әзіл-сықақ жобаларына қатысты. Сонымен қатар театр және продюсерлік бағытта да жұмыс істеді.
Ол "Базар жоқ" театрын құрып, бірқатар әзіл-сықақ жобаларын жүзеге асырған. Сондай-ақ белгілі бір кезеңде "Әзіл әлемі" театрының шығармашылық жұмысына араласқан.
Өнердегі еңбегі үшін бірнеше марапатқа ие болған. 2014 жылы оған "Қазақстан Республикасының мәдениет саласының үздігі" атағы беріліп, Казталов ауданының құрметті азаматы атанды. 2015 жылы Қазақстанның еңбек сіңірген қайраткері атағына ие болды.
Бүгінде Тұрсынбек Қабатов қазақ әзіл-оспақ өнерінде өзіндік қолтаңбасын қалыптастырған, көпшілікке кеңінен танымал сахнагерлердің бірі.
