Бокстан Азия чемпионаты: Қазақстанның «алтыны» көп пе, әлде, Өзбекстандікі ме?
Бүгін Біріккен Араб Әмірлігінің Дубай қаласында бокстан Азия чемпионаты жалауын көтереді. Осыған байланысты «Malim.kz» сайты Азия додасына қатысты қызықты деректермен бөліседі.
- Азия чемпионаты тұңғыш рет 1963 жылы Таиландтың Бангкок қаласында ұйымдастырылды.
- Чемпионат осыған дейін 15 елде өтті. Жарысты ең көп қабылдаған ел – Таиланд (7 мәрте)
- Командалық есепте ең көп топ жарған – Оңтүстік Корея. Олар 1963 жылдан бері 11 рет командалық есепте бірінші орын алды.
- Азия чемпионатын өткізбеген елдердің бірі – Қазақстан. 2008 және 2012 жылдары Астанада Азия құрлығы бойынша Олимпиада ойындарының іріктеу турнирі ұйымдастырылды. Бірақ, бұл жарыстар ресми түрде Азия чемпионаты болып есептелмейді.
- Қазақстан боксшылары үшін 2002 жылғы чемпионат сәтсіз өтті. Малайзияның Серембан қаласында өткен жарыста біздің жігіттер бірде-бір алтын медаль ала алмады – 1 күміс, 4 қола.
- Қазақстан құрамасының боксшылары Азия чемпионатының тарихында 42 алтын медаль жеңіп алды. Оның ішінде: Болат Жұмаділов (1994, 1995), Болат Ниязымбетов (1994, 1995), Ермахан Ибрайымов (1995, 1999), Бақыт Сәрсекбаев (2005, 2007), Серік Сәпиев (2007, 2009), Данияр Елеусінов (2013, 2015), Иван Дычко (2013, 2015) – 2 дүркін Азия чемпиондары. Ал, Василий Левит Қазақстан боксының тарихында 3 дүркін жеңімпаз атанған жалғыз боксшы (2009, 2015, 2017). Бұл жерде 2008 жылғы Олимпиада ойындарының чемпионы Бақыт Сәрсекбаев туралы айта кетсек болады. Бақыт та Азияны үш рет ұтқан. Бірақ, оның 2002 жылғы алтын медалі Өзбекстанның үлесінде.
Өзбек демекші, «ала тақиялы» көршілеріміздің де осыған дейінгі Азия чемпионатында жеңіп алған алтын медальдар саны – 42.
- Бір ғана Азия чемпионатынан ең көп алтын медаль алған Өзбекстан құрамасы. Өзбектер 2017 жылы өз жерінде өткен жарыста 10 салмақтың 9-да топ жарды.
- Қазақстан құрамасы 1994 жылдан бері командалық есепте 5 рет бірінші орынға ие болды. Өзбекстан құрамасы да сондай - 5 рет.
